Netanyahu ‘fjaloset’ me ministrin e mbrojtjes për kushtet e marrëveshjes me Hamasin

Një hendek i madh ka lindur midis kryeministrit izraelit, Benjamin Netanyahu dhe ministrit të Mbrojtjes, Yoav Gallant gjatë një takimit të kabinetit izraelit të sigurisë rreth një marrëveshjeje për pengjet dhe armëpushimin në Gaza.

Të dy burrat debatuan me zemërim nëse, si pjesë e ndonjë marrëveshjeje, ushtria izraelite duhet të largohet nga Korridori i Filadelfit, 14 kilometra që kalon përgjatë kufirit midis Gazës dhe Egjiptit.

Korridori i Filadelfit aktualisht kontrollohet nga Forcat e Mbrojtjes së Izraelit (IDF). Vendosja e trupave izraelite përgjatë korridorit gjatë fazës së parë të marrëveshjes së armëpushimit ka qenë një pikë e madhe mosmarrëveshjeje midis Izraelit dhe Hamasit, ku ky i fundit thotë se trupat izraelite duhet të tërhiqen nga zona kufitare, shkruan cnn.

Netanyahu ka zbuluar harta që tregojnë se si IDF duhet të qëndrojë në korridor gjatë fazës së parë të marrëveshjes – në të cilën pengjet do të lirohen gjithashtu – në mënyrë që të parandalojë Hamasin nga rifillimi i kontrabandës së armëve përmes tuneleve nën korridor.

“Unë do të doja të sjell vendimin që trupat e IDF të mbeten në Korridorin e Filadelfit”, thuhet të ketë thënë Netanyahu.

Gallant ndërhyri, sipas rrëfimeve të takimit, duke thënë se “rëndësia e kësaj është se Hamasi nuk do të pajtohet me të, kështu që nuk do të ketë një marrëveshje dhe nuk do të ketë asnjë peng të liruar”.

Ai gjithashtu pretendoi se Netanyahu kishte hartuar harta të ndryshme nga ato të preferuarat e negociatorëve izraelitë në Kajro, duke shtuar se “ju ua imponuat atyre këto harta”.

Netanyahu e hodhi poshtë me zemërim pretendimin, por Gallant vazhdoi. “Sigurisht që i ke detyruar (ata). Ju i drejtoni negociatat vetë. Që kur shpërndave Kabinetin e Luftës, ne dëgjojmë gjithçka”.

Gallant duket se ka marrë mbështetje nga shefi i Shtabit të Përgjithshëm, Herzi Halevi, i cili ishte në takim. Ai raportohet të ketë thënë se IDF mund të tërhiqet nga korridori dhe të kthehet “në fund të gjashtë javëve të armëpushimit. Ka mjaft kufizime për negociatat, nuk ka nevojë të shtohet një tjetër”.

Sipas rrëfimeve të publikuara, Gallant tha në një moment se “kryeministri me të vërtetë mund të marrë të gjitha vendimet, dhe ai gjithashtu mund të vendosë të vrasë të gjithë pengjet”, duke provokuar qortime nga ministrat e tjerë. Ai shtoi se “30 jetë janë në rrezik”.

Gallant shtoi se “në fund Sinwar do t’ju diktojë dhe ju do të tërhiqeni”, një referencë për liderin e Hamasit, Yahya Sinwar, i cili mendohet të jetë i fshehur në Gaza. Netanyahu thuhet se insistoi se askush nuk e dikton, duke thënë se “vetëm negociatat e vendosura do ta bëjnë atë (Sinwar) të dështojë”.

Kabineti vazhdoi me votimin e hartave që Netanyahu prezantoi, duke i miratuar ato me tetë vota pro dhe një kundër – Gallant. Ministri i Sigurisë Kombëtare i krahut të djathtë, Itamar Ben Gvir abstenoi nga votimi.

Ndryshe, Forumi i Pengëve dhe Familjeve të Zhdukura iu përgjigj raportimeve të mediave për takimin me një deklaratë se ato “duhet të bëjnë që çdo qytetar izraelit të mos flejë”. /Telegrafi/