Siguria në centralin bërthamor Zaporizhzhia të Ukrainës po përkeqësohet, paralajmëron OKB-ja

Siguria në termocentralin më të madh bërthamor në Evropë po përkeqësohet, sipas kreut të mbikëqyrësit bërthamor të OKB-së, Agjencisë Ndërkombëtare të Energjisë Atomike (IAEA).

Termocentrali Zaporizhzhia, në Ukrainën juglindore, ka qenë nën kontrollin rus që nga pushtimi në shkallë të plotë i Ukrainës në shkurt të vitit 2022.

Së fundmi, ai u godit nga një sulm me dron i cili dëmtoi rrugën hyrëse të përdorur nga stafi i termocentralit.

Drejtori i përgjithshëm i IAEA, Rafael Mariano Grossi, ka konfirmuar se ekspertët në vend u informuan për shpërthimin dhe vizituan menjëherë zonën.

Menjëherë pas sulmit, Rusia akuzoi Ukrainën për sulmin me eksploziv pranë termocentralit.

Bëhet e ditur se Zaporizhzhia ka qenë nën sulme të përsëritura që nga fillimi i konfliktit, për të cilat të dy palët e kanë akuzuar njëra-tjetrën, shkruan euronews, përcjell Telegrafi.

Ndërsa reaktorët e termocentralit nuk janë në funksion, Rusia dhe Ukraina kanë qenë në një luftë për vetë ekzistencën e tij, duke pretenduar se armiku i tyre po përpiqet të sabotojë operacionet dhe të rrezikojë sigurinë.

The nuclear safety situation at Ukraine’s Zaporizhzhya Nuclear Power Plant is deteriorating following a drone strike that hit the road around the plant site perimeter today, IAEA DG @rafaelmgrossi said. https://t.co/t2PZJOt09L pic.twitter.com/s1fTDWVT5Y

— IAEA – International Atomic Energy Agency ⚛️ (@iaeaorg) August 17, 2024

Në një deklaratë, Grossi tha: “Përsëri ne shohim një përshkallëzim të sigurisë bërthamore dhe rreziqeve të sigurisë me të cilat përballet termocentrali”.

“Unë mbetem jashtëzakonisht i shqetësuar dhe përsëris thirrjen time për përmbajtje maksimale nga të gjitha anët dhe për respektim të rreptë të pesë parimeve konkrete të vendosura për mbrojtjen e termocentralit”, shtoi ai.

Vendi i goditjes thuhet se ishte shumë afër pellgjeve thelbësore me ujë ftohës dhe vetëm 100 metra nga linja e energjisë Dniprovska.

Kjo është linja e vetme e mbetur që ende siguron furnizim me energji për termocentralin, sipas IAEA.

Ekipi i IAEA që vizitoi zonën tha se dëmi duket se ishte shkaktuar nga një dron i cili ishte i pajisur me një ngarkesë shpërthyese.

Ndërsa raporti i tyre konfirmoi se nuk kishte viktima dhe asnjë ndikim të dukshëm në asnjë pajisje të centralit bërthamor, kishte dëmtime të dukshme në rrugën midis dy portave kryesore të Zaporizhzhia.

Ndryshe, situata shqetësuese e sigurisë në termocentral vjen ndërsa Ukraina vazhdon inkursionin e saj në Rusi.

Zyrtarët pretendojnë se kanë marrë kontrollin e rreth 82 vendbanimeve mbi një sipërfaqe prej 1,150 kilometrash katrorë në rajonin e Kurskut që nga 6 gushti. /Telegrafi/