Harris me mesazh të ri për ekonominë amerikane ndërsa Trumpi dhe republikanët e kritikojnë për inflacionin

Menjëherë pasi presidenti amerikan, Joe Biden, u largua nga gara, zëvendësja e tij Kamala Harris filloi të krijonte narrativën e saj rreth ekonomisë duke vënë theksin në dhënien fund të varfërisë së fëmijëve, duke promovuar sindikatat, duke ulur kostot e shëndetit dhe kujdesit ndaj fëmijëve dhe duke mbrojtur “dinjitetin” në pension.

Asnjë herë në fjalimet në Wisconsin, Indiana apo Teksas ajo nuk e përmendi fjalën “inflacion” – sfida dërrmuese ekonomike që e ka goditur administratën e Biden dhe e ka detyruar atë të pranojë vazhdimisht dhimbjen e votuesve ndërsa përballen me ushqime të larta, benzinë, banesa dhe shpenzimet e automobilave.

“Në vizionin tonë për të ardhmen, ne shohim një vend ku çdo person ka mundësinë jo vetëm të kalojë, por të ecë përpara – një të ardhme ku asnjë fëmijë nuk duhet të rritet në varfëri, ku çdo i moshuar mund të pensionohet me dinjitet dhe ku çdo punëtor ka lirinë për t’u bashkuar me një sindikatë”, tha Harris.

Por, republikanët kanë lëvizur shpejt në përpjekje për të fajësuar Harris për inflacionin, për të cilin deri vonë fajin për të ia kishin vënë Bidenit.

Ata kanë theksuar ndikimin e çmimeve të larta nën administratën demokratike, shkruajnë mediat e huaja, përcjell Telegrafi.

Të dhënat e Departamentit të Punës tregojnë se çmimet e konsumit janë rritur për 19.2% që kur Biden mori detyrën, ndërsa të ardhurat mesatare për orë janë rritur për 16.9%.

Zyrtarët e kaluar dhe aktualë që kanë punuar me Harris, thanë në intervista se ekziston një pritshmëri që kritikat për inflacionin nuk do t’i qëndrojnë asaj, sepse për shumë votues ajo përfaqëson një zë të freskët pas gati tetë vitesh me republikanin Donald Trump ose Biden në zyrën ovale.

Disa nga ata zyrtarë, të cilët folën në kushte anonimiteti sepse nuk ishin të autorizuar të diskutonin publikisht çështjet politike, thanë se Harris ka të ngjarë të qëndrojë në përputhje me propozimin e buxhetit të Bidenit për vitin 2025 dhe planin e tij për të rritur normën e taksës së kompanive në 28% nga 21%, e vendosur nga rishikimi i taksave i Trump për vitin 2017.

Bëhet e ditur se dalja e saj si kandidate demokrate është mbivendosur me lajme pozitive ekonomike.

Departamenti i Tregtisë tha se ekonomia u rrit me një ritëm vjetor prej 2.8% në tremujorin e dytë. Të premten, ai raportoi se matja e shpenzimeve të konsumit personal të inflacionit u lehtësua në një 2.5%, me tregjet financiare që tani presin një ulje të normës së interesit të Rezervës Federale.

Ata që e njohin Harrisin prej vitesh thanë se puna e saj si prokurore në Kaliforni bëri që një ndjenjë e drejtësisë të ishte në thelb të ideve të saj të politikës ekonomike.

“Ajo është një kapitaliste në zemër – ajo dëshiron që bizneset të ecin mirë”, tha Yasmin Nelson, një ish-këshilltare e lartë e Harris.

Trump, në një tubim në Karolinën e Veriut e quajti Harris “zëvendëspresidenten më të paaftë dhe më të majtë në historinë amerikane”.

Rreziku më i madh për Harris mund të jetë se si vazhdimësia e inflacionit formon pikëpamjet e votuesve për ekonominë.

Shumë modele ekonomike të përdorura nga kompanitë financiare për të analizuar zgjedhjet bazohen në partinë e presidentit aktual dhe jo në vetë kandidaten në këtë rast.

Konsulenca Oxford Economics tha në një analizë se shanset favorizonin Trumpin.

Parashikimi bazohet në modele që përdorin të dhëna ekonomike. Nuk llogarit domosdoshmërisht çështjet sociale si aborti dhe kontrolli i armëve që demokratët thonë se do t’i ndihmojnë ata në zgjedhje.

Analiza theksoi se ekziston një shkallë e lartë pasigurie dhe vuri në dukje se shumë gjëra mund të ndodhin në muajt në vijim. /Telegrafi/