Reagimi zyrtar i Rusisë për tërheqjen e Bidenit nga gara ka qenë “i kujdesshëm” – por çfarë mendon ajo në të vërtetë?

Zyrtarisht, Joe Biden ishte “kandidati i preferuar” i presidentit rus, Vladimir Putin, në zgjedhjet amerikane.

Në një intervistë në shkurt të këtij viti, presidenti rus tha se Biden ishte “më i parashikueshëm” se Donald Trump dhe e quajti atë një “politikan të shkollës së vjetër”.

Megjithatë, ato komente u panë më shumë si ironike sesa një deklaratë reale.

Kjo për shkak se rrëmuja politike e çdo lloji në Perëndim është një “argëtim” në Rusi, veçanërisht duke pasur parasysh klimën aktuale, shkruan skynews, përcjell Telegrafi.

Ky lajm mbart implikime potencialisht të mëdha për luftën në Ukrainë, të ardhmen e NATO-s dhe sigurinë evropiane në përgjithësi, kështu që Rusia thuhet se do të vëzhgojë me shumë vëmendje situatën në SHBA.

Megjithatë, reagimi zyrtar nga ana e rusëve ka qenë i kujdesshëm.

Zëdhënësi i Kremlinit, Dmitry Peskov, tha se “mund të ndryshojnë shumë gjëra” përpara zgjedhjeve, duke lënë të nënkuptohet që presidenca e Trumpit nuk është e sigurt.

“Duhet t’i kushtojmë vëmendje, të monitorojmë se çfarë do të ndodhë më pas dhe të mendojmë për ne”, tha Peskov.

Zyrtarë të tjerë rusë kanë qenë më të sinqertë, duke e parë këtë si një mundësi për të shkatërruar karrierën e Bidenit.

Madje, kryetari i dhomës së ulët të parlamentit të Rusisë, Vyacheslav Volodin, e ka akuzuar atë për “gjak në duart e tij”.

“Ai duhet të mbahet përgjegjës për: luftën në Ukrainë; shkatërrimin e ekonomive të shteteve evropiane; politikën e sanksioneve kundër Rusisë”, tha Volodin.

Diku tjetër, zëdhënësja e Ministrisë së Jashtme të Rusisë, Maria Zakharova, ka bërë thirrje për një hetim mbi atë që ajo pretendon se ishte një komplot për të fshehur gjendjen shëndetësore të Bidenit.

Ajo ka akuzuar mediat amerikane se “manipulojnë opinionin publik dhe luajnë së bashku me një parti politike”.

Ndryshe, besohet se këto lloj komentesh ofrojnë një tregues të saktë të asaj që Moska mund ta përdorë për ta përshkruar SHBA-në si vend kaosi dhe konfuzioni. /Telegrafi/