Uragani Beryl drejt Teksasit, amerikanët paralajmërohen për përmbytje dhe erëra të fuqishme

Stuhia Beryl dërgoi shi dhe erëra intensifikuese në Teksas, SHBA, ndërsa banorët po përgatiten për stuhinë tropikale që parashikuesit presin të shndërrohet përsëri në një uragan.

Pjesa më e madhe e vijës bregdetare të Teksasit ishte nën paralajmërim për uragan.

Stuhia e cila u shndërrua në stuhi të shkallës 5 në Atlantik, shkaktoi të paktën 11 vdekje, ndërsa kaloi përmes Karaibeve për në Teksas.

Ajo shkatërroi çatitë e shtëpive me erëra të fuqishme dhe stuhi të nxitura nga nxehtësia rekord, shkruan AP, përcjell Telegrafi.

“Ne po shohim brezat e jashtëm të Berylit që i afrohen bregut të Teksasit tani dhe moti duhet të jetë në rënie veçanërisht këtë pasdite dhe mbrëmje”, tha Eric Blace, specialist i uraganeve në Qendrën Kombëtare të Uraganeve, të dielën në mëngjes.

“Njerëzit duhet patjetër të jenë në hapësirën e tyre të sigurt deri në mbrëmje dhe ne presim që uragani të zbresë diku në bregun e mesëm të Teksasit brenda natës”, shtoi ai.

Bëhet e ditur se Beryl do të jetë uragani i dhjetë që godet Teksasin që nga viti 1851 dhe i katërti në 25 vitet e fundit, sipas studiuesit të uraganeve të Universitetit Shtetëror të Kolorados, Phil Klotzbach.

Tre herë në një javë, Beryl ka fituar 56 km/h në shpejtësinë e erës, përkufizimi zyrtar i shërbimit të motit për intensifikimin e shpejtë.

Zyrtarët e Teksasit kanë paralajmëruar njerëzit përgjatë gjithë vijës bregdetare që të përgatiten për përmbytje të mundshme, shi të dendur dhe erë.

Siç raportohet, paralajmërimi i uraganit shtrihet nga Gjiri Baffin, në jug të Corpus Christi, deri në Sargent, në jug të Hjustonit.

Shtëpia e Bardhë ka njoftuar se Agjencia Federale e Menaxhimit të Emergjencave ka dërguar reagues emergjence, ekipe kërkim-shpëtimi, ujë dhe burime të tjera përgjatë bregut.

Ndryshe, Beryl në fillim të kësaj jave goditi Meksikën si një stuhi e kategorisë 2, duke rrëzuar pemë, por duke mos shkaktuar lëndime apo vdekje përpara se të dobësohej në një stuhi tropikale ndërsa lëvizte nëpër Gadishullin Jukatan.

Para se të godiste Meksikën, Beryl bëri shkatërrim në Xhamajka, Shën Vincent dhe Grenadine dhe Barbados.

Tre persona u raportuan të vdekur në Grenada, tre në Shën Vincent dhe Grenadine, tre në Venezuelë dhe dy në Xhamajka. /Telegrafi/