Ritëm i ngadaltë dhe pa raste, Anglia dhe Zvicra shkojnë me barazim në pushim

Ka përfunduar me rezultat të barabartë 0-0 pjesa e parë mes Anglisë dhe Zvicrës që po luajnë përballë njëra-tjetrës në kuadër të fazës çerekfinale të Euro 2024.

Ndeshja nisi me Anglinë që pati një dominim të lehtë në posedimin e topit, por që nuk arriti ta shfrytëzojë për të krijuar ndonjë rast të rrezikshëm.

Në minutën e 17-të Harry Kane u rrëzua brenda zonës, por gjyqtari italian bëri me shenjë që loja të vazhdojë.

Herë pas here të dy ekipet kishin disa dalje të mira në kundërsulm por që nuk ia dolën të rrezikojnë seriozisht portën e njëra-tjetrës.

Zvicra në këtë pjesë të parë shfaqi një disiplinë taktike duke mos lejuar kundërshtarët që të kenë dominim absolut të lojës.

Anglia në anën tjetër në fazën e sulmit si shpeshherë gjatë këtij edicioni të Euro 2024 po tregon ngecje, andaj Southgate me gjasë do të detyrohet të bëjë disa ndryshime në përbërje në pjesën e dytë.

Kujtojmë se fituesi i këtij ballafaqimi do të përballet në gjysmëfinale me fituesin e ndeshjes Holandë-Turqi e cila do të luhet me fillim nga ora 21:00./Telegrafi/