Pacientët në hall, në QMF-të e Prishtinës nuk ka pediatër – Sadiku e tregon arsyen

Orari i shërbimit pediatrik në Qendrën Kryesore të Mjekësisë Familjare (QMF) të Prishtinës është vetëm nga ora 07:00 deri në orën 15:00. Veç kësaj në shumë QMF nuk ka as pediatër.

Në lidhje me këtë çështje Telegrafi ka pranuar disa ankesa, në të cilat thuhet se qytetarët në mungesë të pediatërve po detyrohen të kërkojnë shërbimet mjekësore në QKUK dhe kjo po shkakton tollovi.

Sipas drejtorit të Shëndetësisë në Prishtinë, Izet Sadiku udhëzimi administrativ nuk lejon punësimin e pediatërve të ri.

“Duke u bazua në një udhëzim administrativ që është 04/2020 që rregullon të punësuarit në qendrat e mjekësisë familjare dhe sipas atij udhëzimi nuk ka të drejtë punësimi i pediatërve apo i mjekëve specialist përveç mjekut familjarë, mjekut të përgjithshëm, mjekut biokimist edhe radiologut, drejtimet e tjera nuk kanë të drejtë me u punësua…Edhe me pas pediatër s’ki të drejtë me punësua se nuk lejohet punësimi i pediatërve në qendrat e mjekësisë familjare”, tha Sadiku për Telegrafin.

Sipas Sadikut, qytetarët po drejtohen në QKUK për shkak të mungesës së Spitalit të Prishtinës.

“Jam i sigurt që për shkak të mungesës së Spitalit të Prishtinës një pjesë e qytetarëve shkojnë drejtpërdrejte në QKU dhe e ngarkojnë QKUK-në. Ne i kemi bë disa takime me shërbimin spitalorë të klinikës universitare se e kemi një marrëveshje me ta të bashkëpunimit dhe njëra prej takimeve që do ta bëjmë në të ardhmen do ta diskutojmë edhe këtë çështje”, tha ai.

Sipas drejtorit të Shëndetësisë mjeku familjar e ka kualifikimin e duhur që të kryen edhe rolin e pediatrit.

“Sipas specializimit që kryen mjeku familjar domethënë e kryen rolin edhe të pediatrit, a në raste kur ai nuk mund me zgjidhë çështjen udhëzohet në Pediatri” tha Sadiku.

Ndryshe, pika e 7 e nenit 4 të Udhëzimit administrativ 04/2020, thotë se për çfarëdo problemi përjashtuar rastet emergjente, pacienti duhet të vizitojë së pari mjekun familjar. /Telegrafi/