Hungaria nuk do t’i bashkohet nismave të NATO-s për Ukrainën, por as nuk do t’i bllokojë ato – thotë Stoltenberg

Sekretari i Përgjithshëm i NATO-s, Jens Stoltenberg pranoi vendimin “të qartë” të kryeministrit hungarez Viktor Orban për të mos marrë pjesë në mbrojtjen e aleancës ndaj luftës së Rusisë në Ukrainë, tha të mërkurën shefi i aleancës.

Megjithatë, vendi i Evropës Qendrore u zotua të mos bllokojë kombet e tjera që të mbështesin financiarisht Ukrainën, sipas Stoltenberg, shkruajnë mediat e huaja, përcjell Telegrafi.

“Unë pres që aleatët tanë të bien dakord për një rol udhëheqës për NATO-n në koordinimin dhe ofrimin e ndihmës dhe trajnimit të sigurisë për Ukrainën. Unë gjithashtu pres që aleatët të bien dakord për një premtim financiar afatgjatë për të ofruar mbështetje ushtarake. Kjo do të sigurojë parashikueshmërinë që i nevojitet Ukrainës”, ka thënë shefi i lartë i NATO-s në një dhomë plot me gazetarë në Budapest.

“Kryeministri Orbán e ka bërë të qartë se Hungaria nuk do të marrë pjesë në këto përpjekje të NATO-s dhe unë e pranoj këtë qëndrim”.

Stoltenberg theksoi se në këmbim të mospjesëmarrjes së Hungarisë, Orban kishte garantuar se vendi nuk do të “bllokonte aleatët e tjerë” me të drejtën e vetos nga një marrëveshje që po arrihet për të premtuar mbështetje financiare për Ukrainën.

“Kryeministri më ka siguruar se Hungaria nuk do t’i kundërshtojë këto përpjekje, duke u mundësuar aleatëve të tjerë të ecin përpara dhe ai ka konfirmuar se Hungaria do të vazhdojë të përmbushë plotësisht angazhimet e saj në NATO”, shtoi ai.

Ndryshe, Aleanca prej 32 anëtarësh merr të gjitha vendimet e saj me konsensus, duke i dhënë në fakt çdo aleat të drejtën e vetos. /Telegrafi/