Biden i kërkon falje Zelenskyt për vonesat në miratimin e paketës me ndihma ushtarake për Ukrainën

Presidenti i SHBA-së, Joe Biden, i ka kërkuar falje homologut të tij ukrainas, Volodymyr Zelensky, për vonesën në fillim të këtij viti në miratimin e paketës së re me ndihma ushtarake, e cila u bllokua nga opozita republikane në Kongres.

Bëhet e ditur se Biden kërkoi falje ndërsa njoftoi një paketë të re ndihme për Ukrainën në një takim dypalësh me Zelenskyn, shkruan CNN.

“Ju e dini, ju nuk jeni përkulur, nuk jeni dorëzuar fare, ju vazhdoni të luftoni në një mënyrë që është thjesht e jashtëzakonshme, është thjesht e jashtëzakonshme dhe ne nuk do të largohemi nga ju”, tha Biden.

Lexo po ashtu Biden dhe Zelensky në një takim ballë për ballë në Francë për të diskutuar ndihmën ushtarake për Ukrainën

“Kërkoj falje për javët që nuk e dija se çfarë do të ndodhte, për sa i përket financimit, sepse ne patëm vështirësi në miratimin e projektligjit, por ne ia arritëm”, shtoi ai.

Ndryshe, presidenti amerikan e shfrytëzoi rastin edhe për të njoftuar për financimin e radhës, si dhe fondet shtesë për Ukrainën.

“Ne kemi njoftuar paketa me financim të konsiderueshëm”, tha Biden.

Ai shtoi: “Sot po nënshkruaj gjithashtu një paketë shtesë me 225 milionë dollarë për t’ju ndihmuar të rindërtoni rrjetin elektrik”. /Telegrafi/