Nga sot vijon afati dhjetëditor për formimin e Qeverisë së re

Nga sot vijon të rrjedhë afati dhjetëditor për dhënien e mandatit partisë ose partive që kanë shumicën në Kuvend për formimin e qeverisë së re. Deri tani, nuk ka njoftim nga kabineti i presidentes Gordana Siljanovska Davkova se kur do t’i japë mandatin kreut të opozitës së deritanishme Hristijan Mickoski pasi një shumicë e re u konfirmua me deputetët që votuan zgjedhjen e kreut të ri në Kuvend.

Pas dhënies së mandatit, Mickoski do të ketë njëzet ditë afat për të prezantuar para deputetëve kabinetin e tij qeveritar si dhe programin e qeverisë së ardhshme.

Sipas paralajmërimeve, mandatari i ardhshëm nuk planifikon të shfrytëzojë në maksimum afatet dhe qeveria e re mund të jetë e votuar deri më 20 qershor.

Një marrëveshje mes OBRM-PDUKM-së, VLEN-it dhe ZNAM-it është pothuajse e konfirmuar kurse palët flasin hapur se negociatat janë në fazën e caktimit të posteve të eshalonit të dytë dhe të tretë si dhe të harmonizimit të programit.

Sipas kësaj marrëveshje e cila akoma është jozyrtare, VLEN-it do të t’i takojnë gjashtë ministra, njëri prej të cilëve do të jetë edhe zv/kryeministër i parë, si dhe shtatë zv.ministra. VLEN nuk e mohoi dhe as nuk e konfirmoi edhe informacionin që do t’i takojnë edhe rreth 400 drejtori.

Nga ana tjetër, ZNAM pritet të marrë dy poste ministrore por është akoma e paqartë sa zv/ministra dhe drejtori do të ndahen për partinë e Maksim Dimitrievskit.