SHBA-ja do të njoftojë një tjetër paketë ushtarake për Ukrainën

SHBA-ja pritet të shpallë një ndihmë ushtarake shtesë prej 275 milionë dollarësh për Ukrainën, ndërsa Kievi përpiqet të pengojë përparimet e trupave ruse në Kharkiv.

Kjo do të jetë hera e katërt që SHBA-ja e ndihmon ushtarakisht Ukrainën që kur Kongresi miratoi projekt-ligjin për ndihmën e huaj.

Sipas dy zyrtarëve amerikanë të cilët folën në kushte anonimiteti, paketa përfshin sisteme raketash artilerie HIMARS, municione si dhe fishekë 155 mm dhe 105 mm, shkruan yahoonews, përcjell Telegrafi.

Artikujt shtesë në paketë përfshijnë sistemet antitank Javelin dhe AT-4, armë të vogla dhe municione për armë.

Lexo po ashtu SHBA po përgatit një paketë të re ndihme ushtarake prej 6 miliardë dollarësh për Ukrainën

Bëhet e ditur se ndihma pason nga mbledhja me rreth 50 liderë të mbrojtjes nga Evropa të cilët takohen rregullisht për të koordinuar më shumë ndihma ushtarake për Ukrainën.

Sekretari amerikan i Mbrojtjes, Lloyd Austin, tha se Ukraina po përballet me sfida shkaku i sulmeve në Kharkiv, andaj ai u zotua të mbajë armët në lëvizje.

Ndryshe, që kur presidenti amerikan, Joe Biden, nënshkroi paketën e huaj prej 95 miliardë dollarësh, SHBA-ja ka njoftuar edhe për miliarda të tjera ndihmë për ukrainasit nga rezervat e Pentagonit. /Telegrafi/