Sadik Durakut “po i skadon” paraburgimi në Serbi, familjarët kërkojnë informacion

Familjarë të Sadik Durakut nga Kosova, i ndaluar në Serbi qysh më 17 prill, thonë se nuk kanë informacione se çfarë është duke ndodhur me të, ndërkohë që avokati thotë se masa e paraburgimit të tij është “duke skaduar”.

Duraku, i cili ka nënshtetësi britanike, u arrestua muajin e kaluar në një vendkalim kufitar mes Kroacisë dhe Serbisë, nën dyshimet “për krime lufte” më 1999 – akuza që u hodhën poshtë nga familjarët.

Ministria e Punëve të Jashtme dhe Diasporës e Kosovës konfirmoi atëkohë për Radion Evropa e Lirë se atij i është shqiptuar masa e paraburgimit prej 30 ditësh.
REL-i e pyeti MPJD-në nëse ka informacione për rastin e tij tash që ka përfunduar ky afat, por nuk mori përgjigje.

Vëllai i Sadik Durakut, Avdyl Duraku, thotë se është “tejet i shqetësuar” për fatin e tij.

“Nuk e di se si të veproj nga Kosova… Avokati i tij, tash e tri javë, na thotë se në këtë javë mbahet seancë, në këtë javë… Vëllai im po mbahet padrejtësisht në burgjet e Serbisë”, thotë Duraku për REL-in.

Lexo po ashtu Duraku mbetet në paraburgim në Serbi, avokati thotë se ky është revanshizëm ndaj Kosovës

Shton, po ashtu, se gjendja e tij shëndetësore nuk është e mirë, pasi vuan nga problemet në zemër.

Avokati i Sadik Durakut, Goran Petronijeviq, thotë se klientit të tij është “duke i skaduar afati i paraburgimit”, por nuk specifikon kur.

“Tani vendoset nëse do të vazhdohet paraburgimi prej 30 ditësh apo do të ndryshohet me ndonjë masë tjetër”, thotë ai për Radion Evropa e Lirë.

Sipas Petronijeviqit, masa e ndalimit është caktuar për shkak të, siç është thënë, rrezikut të arratisjes, sepse bëhet fjalë për shtetas të huaj, por edhe “shqetësimit publik”, meqë mediat kanë raportuar për rastin.

Akuza për “shqetësim publik” u hodh poshtë në apelin e tij.

Petronijeviq thotë se masë më e përshtatshme do të ishte arresti shtëpiak ose lirimi me obligimin që Duraku të qëndronte në Serbi derisa të zgjidhej rasti.

Përkundër insistimit të REL-it, ai nuk jep ndonjë datë se kur mund të mbahet seanca për Durakun.

Familjarët thonë se akuzat kundër Durakut nuk qëndrojnë, pasi ai, para luftës në vitin 1999, ka jetuar me familjen e tij në Angli.

Petronijeviq thotë, po ashtu, se beson se Duraku nuk është person i kërkuar për krime lufte.

Ambasada e Britanisë së Madhe në Beograd konfirmoi më herët për REL-in se është e informuar për rastin e Sadik Durakut.