KFOR-i konfirmon se është njoftuar për aksionin policor në veri, por s’është përfshirë në të

Misioni i NATO-s në Kosovë, KFOR, ka bërë të ditur se është informuar vetëm pak kohë para se policia e Kosovës të ndërmerrte aksionin në veri të vendit, aksion ky që kishte si shënjestër institucionet financiare serbe dhe që rezultoi me mbylljen e gjashtë objekteve të Bankës Kursimore të Postës dhe të Bankës Popullore të Serbisë në katër komunat veriore të Kosovës.

Sipas një deklarate të publikuar nga KFOR-i, theksohet se ata nuk kanë pasur rol në këtë operacion, dhe shprehen pritshmëritë për konsultime paraprake në lidhje me veprimet e planifikuara që mund të kenë ndikim në situatën e sigurisë në rajon.

“Njoftimi nga KFOR-i erdhi pak para se të fillonin operacionet kundër degëve të Bankës Postanska Stedionica në Mitrovicën e Veriut, Leposaviq, Zveçan dhe Zubin Potok. Asnjë nga personeli i KFOR-it nuk ishte i angazhuar në zbatimin e këtyre veprimeve,” u shpreh komunikata.

KFOR-i vijoi të theksojë angazhimin e tyre në mbështetje të dialogut ndërmjet Prishtinës dhe Beogradit, i cili lehtësohet nga Bashkimi Evropian, duke ofruar një kornizë sigurie që të lejojë diplomacinë të vazhdojë me sukses.

“Kjo është rruga e vetme për të adresuar çështjet e mbetura me qëllim të gjetjes së zgjidhjeve që respektojnë të drejtat e të gjitha komuniteteve,” shtoi deklarata.

Në raport me aksionin e policisë së Kosovës, u bë e ditur se gjatë operacionit janë sekuestruar prova të ndryshme monetare, duke përfshirë një sasi të konsiderueshme të euros, dinarëve serbë, frangave zvicerane dhe dollarëve amerikanë.

Lexo po ashtu BE: Mbyllja e degëve të bankës serbe në veri të Kosovës, veprim i pakoordinuar dhe përshkallëzues

Policia e Kosovës, e cila ndau edhe imazhe të parave të konfiskuara, deklaroi se kanë gjetur sasi të mëdha parash në monedha të ndryshme, duke detajuar shumën e eurove, dinarëve serbë, frangave dhe dollarëve të sekuestruara.

Ky veprim i policisë së Kosovës vjen pas një njoftimi nga Banka Qendrore e Kosovës që bëri të ditur se afati tranzitor për një rregullore të re, e cila ndalon përdorimin e dinarit serb në transaksione financiare brenda territorit të Kosovës, ka përfunduar./Telegrafi/