Qeveria gjermane refuzon thirrjen e politikanëve të saj për të ndaluar fluturimet mbi Ukrainë

Së fundmi, disa politikanë gjermanë kanë bërë thirrje për ndalimin e fluturimeve mbi Ukrainë.

Por, kërkesa është hedhur poshtë nga një zëdhënës i qeverisë gjermane i cili theksoi se Gjermania ende nuk e ka ndryshuar qëndrimin që kur e ka refuzuar një thirrje të tillë në nëntor të vitit të kaluar.

“Ne e refuzuam atë në atë kohë dhe mendoj se e njëjta përgjigje vlen edhe për kërkesën e tanishme”, tha zëdhënësi.

Ndryshe, NATO hodhi poshtë kërkesën e Ukrainës për të ndaluar fluturimet mbi territorin e saj gjatë vitit 2022, disa ditë pasi filloi pushtimi rus në shkallë të plotë.

Lexo po ashtu Gjermania do të blejë tre sisteme raketore amerikane Himars për Ukrainën

Gjatë asaj kohe, Sekretari i Përgjithshëm i aleancës më të madhe ushtarake, Jens Stoltenberg, e arsyetoi vendimin duke theksuar se “NATO nuk është pjesë e konfliktit”.

“Ne kemi përgjegjësi për të parandaluar që kjo luftë të përshkallëzohet përtej Ukrainës”, tha Stoltenberg.

Gjithashtu, sipas zyrtarëve evropianë, krijimi i një zone ku ndalohen fluturimet do të përbënte kërcënim për konfrontim të drejtpërdrejtë midis Rusisë dhe NATO-s.

Mirëpo, bëhet e ditur se anëtarët e aleancës mund ta trajtojnë ndalimin e fluturimeve si çështje shqetësuese gjatë takimeve të tyre, në bazë të nenit 4 të traktatit themelues të saj. /Telegrafi/