Reagon klubi i Dritës për ngjarjet e fundit, shkruan se nuk do ta largojnë Valon Zymberin

Drita ka reaguar në rrjetet sociale për incidentet e fundit ku janë përfshirë edhe udhëheqës e klubit, ndër ta, drejtori sportiv, Valon Zymberi.

Klubi në një reagim të gjatë ka shpjeguar se si ka ardhur deri tek ky moment, ndërsa i ka dal në mbrojtje Valon Zymberit, duke shkuar se ai do të vazhdojë të mbetet në pozitë “përderisa nuk ka shkelur statutin e kompanisë sonë”.

Valon Zymberi me disa persona të tjerë ka sulmuar udhëheqësin e tifozërisë ‘Intelektualët’, Taulant Byqmeti.

Zymberi dhe dy persona të tjerë janë arrestuar dhe po mbahen në mbajtje nga Policia e Kosovës.

Më poshtë komunikata e plotë e Dritës për rastin në fjalën.

Kryesia dhe stafi drejtues i FC Dritës pas analizimit të gjendjes së krijuar shpreh shqetësimin dhe dënimin e plotë të ngjarjes së ndodhur ditën e mërkure pas ndeshjes për Kupë ndërmjet Dritës dhe Prishtinës.

Në lidhje me sulmin fizik ndaj kryetarit të tifozëve, është e qartë se kjo sjellje është e papranueshme dhe e dënojmë ashpër. Nuk mund të lejojmë që ndeshja e pasionuar për futboll të shndërrohet në dhunë fizike.

Megjithatë, është e rëndësishme të theksojmë se situata ka shkuar në këtë drejtim për shkak të një historie të gjatë tensionesh dhe urrejtjeje të ndërsjellë midis individëve të përfshirë. Në veçanti, tensionet midis drejtorit sportiv të FC Dritës z. Valon Zymberi dhe të tifozëve “Intelektualët” kanë qenë të dukshme për një kohë të gjatë. Kjo si rezultat i personave nën hije që manipulojnë me tifozët për interesat personale. Drejtori ynë sportiv, z. Valon Zymberi, ka qenë objekt i një presioni të madh dhe urrejtjes së përsëritur nga disa individë, gjë që ka shkaktuar një klimë të ndjeshme tensioni. Ka vite që disa individë me interesa personale kanë ushtruar presion dhe kanë përdorur tifozët për të krijuar urrejtje dhe tensione ndaj kryesisë së klubit, veçanërisht drejtorit sportiv, z. Valon Zymberi. Në vend që të kontribuojnë në zhvillimin e klubit dhe në avancimin e sportit lokal, këta individë kanë zgjedhur të manipulojnë dhe të përhapin fjalë urrejtjeje, duke sjellë një klimë të papranueshme për të gjithë pjesëmarrësit në sport.

Në rastin e sulmit të ndodhur, është e qartë se reagimi i Drejtorit Sportiv është ndikuar nga faktorë emocional dhe tensione të krijuara nga përballja me sharjet dhe presionin psiqik duke i përmendur ngjitjen e fotografive nëpër shtylla dhe vende publike të Valon Zymberit me sharje dhe nënçmime. Drejtori Sportiv z. Valon Zymberi është sharë me grua, motër dhe vajzë në prani të familjarëve.

Prandaj, është e rëndësishme të kuptohet se sharjet dhe presioni emocional në drejtim të një personi ose familjeje janë të papranueshme dhe nuk duhet të tolerohen. Presionet e tilla shkaktojnë stres dhe ankth të madh, dhe në disa raste mund të çojnë në reagime të paparashikueshme ose të afektuara siç edhe ka ndodhur.

Në shoqërinë tonë, është e rëndësishme të kuptojmë dhe të respektojmë ndjeshmërinë dhe të drejtën e të gjithë personave për të qenë të mbrojtur nga presioni i papërballueshëm dhe fyerjet e panevojshme.

Lexo po ashtu Nga rrahja e kryetarit të ‘Intelektualëve’ deri tek dërgimi i Valon Zymberit dhe dy personave tjerë në mbajtje – e gjithë situata

Duke e ditur këtë, në reagimin tonë duhet të përfshihet një thirrje për të kuptuar kontekstin dhe të mos hulumtojmë vetëm pamjet e jashtme të situatave, por edhe faktorët emocionalë dhe psikologjikë që mund të kenë ndikuar në sjelljen e individëve.

Në të njëjtën kohë, ne mbetemi të vendosur në qëndrimin tonë për dënimin ashpër të dhunës dhe përdorimit të saj si mjet për të zgjidhur konfliktet. Nëpërmjet komunikimit dhe respektit të reciprok, ne mund të gjejmë rrugë të qëndrueshme dhe paqësore për të zgjidhur konfliktet dhe për të ndërtuar një mjedis të shëndetshëm dhe të harmonishëm për të gjithë.

Si një klub sportiv, ne mbështesim vlerat e respektit dhe bashkëpunimit, dhe këto veprime të dhunshme nuk përputhen me vlerat tona. Klubi është një biznes i regjistruar sipas ligjeve të Kosovës dhe menaxhohet nga dy pronarë legjitim, dhe nuk lejojmë ndikimin e jashtëm në vendimet tona të menaxhmentit. Prandaj, ju konfirmojmë që deri sa z. Zymberi nuk shkel statutin e kompanisë tonë do të jetë në pozitën të cilën e ka pasur deri më tani.

Megjithatë, është e rëndësishme të theksojmë se ne nuk mund të justifikojmë asnjë formë të dhunës ose agresionit, pavarësisht nga arsyetimi. Kemi besim tek institucionet e drejtësisë për të trajtuar çështjet në mënyrë të drejtë dhe profesionale.

FC Drita ka një histori të lavdishme dhe një potencial të madh për të ardhmen në futboll. Është detyrë e jona të sigurojmë që ky potencial të përfaqësohet në mënyrën më të mirë dhe të ndërtojmë një klime pozitiv të përkushtimit dhe pasionit për lojën.

Kryesia është e vendosur dhe e zotuar që ta mbajë FC Drita në nivelet më të larta të futbollit kosovarë dhe më gjerë, edhe për një kohë të gjatë pavarësisht presionit të jashtëm të disa individëve që po tentojnë prishjen e atmosferës në klub. Ne nuk dorëzohemi dhe do ta mbajmë Dritën lartë e më lartë.

/Telegrafi/