Zvicra i kërkon Serbisë të mos e bllokojë Kosovën, ndërsa Kosovës të themelojë Asociacionin

Në Këshillin e Sigurimit, përfaqësuesja e Zvicrës ka bërë thirrje për realizimin e premtimit të Serbisë dhe Kosovës ndaj marrëveshjeve të arritura në Bruksel.

Me një ton të prerë, ajo i ka bërë thirrje Serbisë të mos e pengojë përpjekjen e Kosovës për anëtarësim në organizata ndërkombëtare.

“I bëjmë thirrje Serbisë që të heq çdo paqartësi në lidhje me përkushtimin e saj ndaj marrëveshjeve dhe të përmbahet nga kundërshtimi i anëtarësimit të Kosovës në organizata ndërkombëtare,” theksoi përfaqësuesja.

Paralelisht, Zvicra nuk e ka lënë pa vënë në dukje edhe përgjegjësitë e Kosovës, duke kërkuar themelimin e Asociacionit të Komunave Serbe pa vonesa.

Kjo, sipas përfaqësueses, do të ishte një hap i rëndësishëm drejt ndërtimit të marrëdhënieve konstruktive mes të dy vendeve.

“Të dy palët ndajnë përgjegjësi për uljen e tensioneve. Eskalimet si ajo e Banjskës duhet të shmangen me çdo kusht dhe përgjegjësit duhet të sillen para drejtësisë,” shtoi ajo, duke iu referuar incidenteve të fundit që kanë tronditur rajonin.

Ndërsa për votimet që nuk patën pjesëmarrjen e serbëve në veri të Kosovës, Zvicra shprehu keqardhje për mungesën e pjesëmarrjes së komunitetit serb.

Përfaqësuesja e Zvicrës u shpreh se inkurajon qeverinë e Kosovës të shtojë përpjekjet për integrimin më të thellë të pakicës serbe në shoqërinë kosovare.

Në përfundim, Zvicra thekson nevojën për angazhim të vazhdueshëm dhe dialog të hapur për të tejkaluar sfidat dhe për të siguruar një të ardhme më të qëndrueshme dhe të paqme për të gjithë në rajon.