Si në një ring boksi – deputeti gjeorgjian godet kundërshtarin në fytyrë, në një përplasje për projektligjin për “agjentët e huaj”

Politikanët gjeorgjianë janë përplasur në parlament, ndërsa ligjvënësit e partisë në pushtet synonin të avanconin një projekt-ligj të diskutueshëm për “agjentët e huaj” që është kritikuar nga vendet perëndimore dhe ka nxitur protesta në vend.

Sipas mediave të huaja, përcjell Telegrafi, pamjet e transmetuara të hënën në televizionin gjeorgjian treguan Mamuka Mdinaradze, kreun e fraksionit parlamentar të partisë qeverisëse dhe një forcë shtytëse pas projektligjit, duke u goditur me grusht në fytyrë nga deputeti i opozitës Aleko Elisashvili.

Siç thuhet më tej, incidenti shkaktoi një përleshje më të gjerë midis disa ligjvënësve, një dukuri jo e rrallë në parlamentin shpesh të ashpër të Gjeorgjisë.

Dhe më pas thuhet se Elisashvili ishte përshëndetur me brohoritje nga protestuesit jashtë ndërtesës së parlamentit.

“Ëndrra Gjeorgjiane” tha në fillim të këtij muaji se do të rifusë legjislacionin që kërkon që organizatat që pranojnë fonde nga jashtë të regjistrohen si “agjentë të huaj” ose të përballen me gjoba, 13 muaj pasi protestat e detyruan atë të anulojë planin.

Projektligji ka tensionuar marrëdhëniet me vendet evropiane dhe SHBA-në, të cilat kanë thënë se e kundërshtojnë miratimin e tij.

BE, e cila i dha Gjeorgjisë statusin e kandidatit në dhjetor, ka thënë se masa është e papajtueshme me vlerat e bllokut.

“Ëndrra Gjeorgjiane” thotë se dëshiron që vendi të anëtarësohet në BE dhe NATO, edhe pse ka thelluar lidhjet me Rusinë dhe është përballur me akuza për autoritarizëm në vend.

Ai thotë se ligji është i nevojshëm për të luftuar ato që i quan “vlera pseudo-liberale” të imponuara nga të huajt dhe për të promovuar transparencën. /Telegrafi/