Një e treta e anijeve luftarake ruse në Detin e Zi janë mbytur ose paaftësuar nga forcat e Kievit

Sipas marinës së Ukrainës, një e treta e anijeve luftarake ruse në Detin e Zi janë mbytur ose paaftësuar nga forcat e Kievit që nga fillimi i luftës pak më shumë se dy vjet më parë.

Sipas mediave të huaja, përcjell Telegrafi, shifrat erdhën nga zëdhënësi i marinës ukrainase, kapiteni Dmytro Pletenchuk pasi Kievi pretendoi se kishte goditur katër anije ruse me raketa Neptun të ndërtuara në vend në një ditë të vetme në Krimenë e aneksuar.

“Qëllimi ynë përfundimtar është ‘zhdukja’ e plotë e anijeve ushtarake të të ashtuquajturës Federata Ruse në rajonet e Azov dhe Detit të Zi”, tha Pletenchuk.

Kievi ka vënë në shënjestër flotën ruse të Detit të Zi gjatë pushtimit të plotë të presidentit Vladimir Putin, i cili filloi në shkurt 2022.

Lexo po ashtu Elon Musk vjen me një parashikim të pakëndshëm për Kievin - me siguri do të nxisë reagime në Ukrainë

Ukraina është zotuar të anulojë aneksimin e Krimesë nga lideri rus në 2014, i cili tani shërben si qendra logjistike qendrore e Moskës për forcat e saj në Ukrainën jugore.

Ndërkohë Molfar, një agjenci e inteligjencës me burim të hapur, në analizën e humbjeve të flotës ruse nga 24 shkurt 2022 deri më 15 shkurt 2024, raportoi se një gamë e gjerë e forcave detare të Putinit janë shënjestruar në luftë, me humbje duke përfshirë anije të vogla dhe të mëdha që kryejnë funksione të ndryshme, nga operacionet amfibe deri te patrullimi.

“Më të prekshmet rezultuan se ishin anijet patrulluese dhe ato për zbarkim, gjë që tregon efektivitetin e lartë të mjeteve të mbrojtjes ukrainase”, zbuloi Molfar.

“Humbjet e anijeve dhe fregatave të mëdha zbarkuese pakësojnë aftësinë e agresorit për të kryer operacione detare në shkallë të gjerë, duke pasur pasoja strategjike afatgjata për flotën ruse”. /Telegrafi/