Një vend në Afrikë mbyll të gjitha shkollat – temperaturat pritet të arrijnë në 45 gradë Celsius

Sudani i Jugut do të mbyllë të gjitha shkollat nga e hëna në përgatitje për një valë ekstreme të të nxehtit që pritet të zgjasë dy javë.

Ministritë e shëndetësisë dhe arsimit kanë këshilluar prindërit që t’i mbajnë të gjithë fëmijët brenda, pasi temperaturat pritet të rriten në 45C (113F), shkruajnë mediat e huaja, përcjell Telegrafi.

Deklarata e lëshuar vonë të shtunën nuk specifikonte se sa kohë do të qëndrojnë të mbyllura shkollat.

Ministritë thanë se “do të vazhdojnë të monitorojnë situatën dhe të informojnë publikun në përputhje me rrethanat”.

Peter Garang, i cili jeton në kryeqytetin, Juba, e përshëndeti vendimin.

Ai tha se shkollat duhet të lidhen me rrjetin elektrik për të mundësuar instalimin e kondicionerëve.

Sudani i Jugut, një nga kombet më të rinj në botë, është veçanërisht i prekshëm ndaj krizës klimatike me valë të nxehta të zakonshme, por rrallë që i kalojnë 40C (104F).

Konflikti civil ka goditur vendin e Afrikës Lindore, i cili gjithashtu vuan thatësirën dhe përmbytjet, duke i vështirësuar kushtet e jetesës.

Programi Botëror i Ushqimit në përmbledhjen e tij të fundit tha se Sudani i Jugut “vazhdon të përballet me një krizë të tmerrshme humanitare” për shkak të dhunës, paqëndrueshmërisë ekonomike, ndryshimeve klimatike dhe një fluksi njerëzish që ikin nga konflikti në Sudanin fqinj. /Telegrafi/