Donald Trump mund të rrezikojë të humbasë disa prej pronave të tij të çmuara nëse nuk mundet të paguajë gjobën në New York. Gjoba e tij prej afro 454 milionë dollarësh, që iu dha nga një gjykatë shtetërore në New York për fryrjen e vlerave të pasurive të tij në aplikimet për kredi, për shkak të normës së interesit do të rritet me 87,502 dollarë në ditë derisa ai ta ketë paguar.
Prokurorja e Përgjithshme e New Yorkut, Letitia James i tha kanalit “ABC News” të martën se ajo do të kërkojë konfiskimin e disa prej pronave të ish-presidentit nëse ai nuk është në gjendje të paguajë gjobën e vendosur nga gjykatësi Arthur Engoron më 16 shkurt.
Gjykatësi Engoron arriti në përfundimin se ish-presidenti amerikan gënjeu për vite me radhë për pasurinë e tij, ndërsa ndërtoi perandorinë e pasurive të paluajtshme që e bëri të famshëm dhe e ndihmoi të arrinte deri në Shtëpinë e Bardhë. Trump ka mohuar akuzat për shkelje dhe është zotuar se do të apelojë vendimin e gjykatës.
“Nëse ai nuk ka fonde për të paguar gjobën, atëherë për zbatimin e vendimit të gjykatës do t’i kërkojmë gjyqtarit që të sekuestrojë pasuritë e tij”, tha prokurorja demokrate Letitia James në një intervistë me gazetarin e kanalit “ABC”, Aaron Katersky.
Mundësitë e Trumpit për të paguar tarifat e tij ligjore në rritje po vështirësohen nga humbjet e njëpasnjëshme të gjyqeve. Në janar, një juri e urdhëroi atë të paguante 83.3 milionë dollarë për shpifje ndaj shkrimtares E. Jean Carroll, raporton zeriamerikes.
Trump pretendoi vitin e kaluar se ai ka rreth 400 milionë dollarë para të gatshme, rezerva që do të shpenzoheshin për proceset gjyqësore ndaj tij. Pjesa tjetër e pasurisë së tij, që ai thotë se ka një vlerë prej disa miliarda dollarësh, është e lidhur me fushat e golfit, ndërtesat shumëkatëshe dhe prona të tjera, si dhe investimet.
Por prokurorja James nuk do të mund të fillojë menjëherë përpjekjet për të marrë çelësat e ndërtesës “Trump Tower” në New York apo pronës së tij Mar-a-Lago në Florida. Apelimi, që Trump ka premtuar se do të bëjë për vendimin që i dha atij gjobën prej gati 454 milionë dollarësh, ka të ngjarë të pezullojë pagesën e gjobës ndërsa procesi i apelimit vazhdon.
Më poshtë mund të lexoni një pasqyrë të këtij procesi, pas vendimit me kosto të lartë të gjykatës në New York ndaj ish-presidentit.
A mund t’i konfiskohet pasuria Trumpit?
Po. Nëse Trump nuk është në gjendje të paguajë, shteti “mund të konfiskojë dhe të shesë pasuritë e tij, të bllokojë pronat e tij të paluajtshme dhe të marrë një pjesë të të ardhurave të atyre që kanë marrë borxhe nga Trump”, thotë profesori i drejtësisë në Universitetin e Sirakuzës, Gregory Germain.
Sekuestrimi i pasurive është një taktikë e zakonshme ligjore kur një i pandehur nuk ka para të mjaftueshme për të paguar gjobat. Një shembull i famshëm është ai ish lojtarit të njohur të futbollit amerikan, O.J. Simpson, të cilit autoritet ia konfiskuan “Trofeun Heisman” dhe e shitën në ankand në vitin 1999 për të paguar një pjesë të dënimit të tij prej 33.5 milionë dollarësh.
Ish-presidenti amerikan mund të shmangë sekuestrimin e pasurive nëse ka para të mjaftueshme, apo do të sigurojë para të mjaftueshme, për të paguar gjobën dhe normën e interesit në rritje.
Nuk është e qartë se sa para të gatshme ai ka, sepse shumica e informacionit për financat e Trumpit vijnë nga vetë 77-vjeçari, përmes raportimeve dhe pasqyrave financiare vjetore, që gjykatësi Engoron i ka konsideruar mashtruese.
Trump raportoi se kishte rreth 294 milionë dollarë në para të gatshme, ose ekuivalente të kësaj shume, në pasqyrën e tij më të fundit financiare vjetore për vitin fiskal që përfundoi më 30 qershor 2021.
Pas kësaj, sipas avokatëve të shtetit, ai shtoi rreth 186.8 milionë dollarë nga shitja e hotelit të tij në Uashington në maj të vitit 2022 dhe shitja e të drejtave për të menaxhuar një fushë golfi në qytetin e New Yorkut në qershor 2023. Një pjesë e dënimit të Trumpit kërkon që ai t’ia japë ato të ardhura shtetit, plus interesin e akumuluar.
Vendimi i gjykatësit Engoron javën e kaluar e kurseu perandorinë e pasurive të paluajtshme të zotit Trump nga ajo që kandidati kryesor republikan e konsideroi “dënim me vdekje të korporatës”, duke anuluar një vendim të mëparshëm dhe duke zgjedhur ta lejojë kompaninë e tij të vazhdojë biznesin, megjithëse me kufizime të rënda, përfshirë mbikëqyrjen nga një inspektor i caktuar nga gjykata.
Prokurorja James nuk specifikoi për kanalin “ABC” se cilat nga pasuritë e Trumpit mund të konfiskojë shteti, megjithëse ajo vuri në dukje se zyra e saj ndodhet pikërisht përballë një ndërtese në pronësi të Trump në Manhatan, që ishte objekt i disa veprimeve mashtruese të përfshira në padinë e saj.
“Jemi të përgatitur të sigurohemi që gjoba t’u paguhet njujorkezëve”, tha prokurorja James në intervistën për kanalin ABC.
Si do të ndikojë apelimi në dënimin e Trumpit?
Nëse Trump e apelon vendimin, atëherë gjatë periudhës së apelimit ai nuk do ta paguajë gjobën dhe nuk do të përballet me sekuestrim të pasurive të tij. Nëse e fiton apelin, ai mund të mos ketë nevojë të paguajë asnjë pjesë të gjobës.
Sipas ligjit të shtetit të New Yorkut, Trump merr automatikisht një pezullim të detyrimit për të paguar gjobën në këmbim të një garancie financiare, që dëshmon se ai mund të paguajë të gjithë gjobën. Ky është një mekanizëm ligjor që ndalon zbatimin e një vendimi gjyqësor gjatë procesit të apelimit.
“Edhe nëse vendosim ta apelojmë këtë, gjë që do ta bëjmë, ne duhet të ofrojmë garancinë e pagesës, që është shuma e plotë e gjobës dhe ne do të jemi të përgatitur ta bëjmë këtë”, tha avokatja e Trump, Alina Habba në një intervistë për kanalin “Fox News” të hënën.
Avokatët e ish-presidentit amerikan mund t’i kërkojnë gjithashtu gjykatës së apelit, që të pezullojë zbatimin e vendimit pa ofruar garanci për pagesën e gjobës, ose për një garanci me vlerë më të ulët se sa shuma e plotë e gjobës.
Në çështjen e tij penale të ndërhyrjes në zgjedhjet në Georgia, Trump pagoi 20 mijë dollarë, rreth 10 për qind të garancisë prej 200 mijë dollarësh, të kërkuar fillimisht nga gjykata për gjykimin e tij në liri. Pas humbjes në një gjyq të parë ndaj shkrimtares Carroll vitin e kaluar, Trump vendosi 5.55 milionë dollarë garanci për të mbuluar koston e gjykimit gjatë procesit të apelimit. Ai ka thënë se do të apelojë vendimin e janarit prej 83.3 milionë dollarësh, por ende nuk e ka bërë këtë.
“Nëse ai nuk mund të plotësojë kërkesat e divizionit të apelit, atëherë mendoj se ai do të fillojë procedurat e falimentimit për të përfituar nga ligji që në mënyrë automatike ndalon zbatimin e vendimit për të paguar gjobën gjatë procesit të apelimit”, thotë profesor Germain. “Por para kësaj duhet të ndodhin disa hapa të tjerë, kështu që ne do të duhet të presim për të parë se çfarë do të ndodhë.”
Zotimi i Trumpit për të apeluar të gjitha çështjet ligjore, do t’i zvarrisë betejat e tij ligjore deri në fund të fushatës për zgjedhjet paraprake republikane, në të cilat ai pritet të marrë emërimin e partisë për kandidat të saj në zgjedhjet presidenciale të nëntorit.
Apeli gjithashtu ka të ngjarë të përkojë me gjyqin e tij penal në New York muajin e ardhshëm për çështjen e pagesave për të blerë heshtjen e disa grave, me të cilat ai ka pasur marrëdhënie intime, e para nga katër çështjet penale që do të shkojnë në gjyq.
Ish-presidenti amerikan nuk mund të apelojë ende vendimin për gjobën në Nju Jork sepse zyra e nëpunësit në gjykatën, ku punon gjykatësi Engoron duhet së pari të paraqesë dokumentet për të zyrtarizuar vendimin. Sapo të ndodhë kjo, Trump do të ketë 30 ditë për të apeluar vendimin, apo për të paguar gjobën.
Shuma e interesit prej 87,502 dollarësh në ditë
Çdo ditë që kalon pa u paguar gjoba, Trump detyrohet të paguajë 87,502 dollarë interes për gjobën për falsifikim të vlerës së bizneseve të tij. Nga 16 shkurti, kur gjykata dha vendimin për këtë, deri të enjten më 23 shkurt, gjoba do të rritet me 525 mijë dollarë për shkak të normës së interesit, e cila do të vazhdojë të rritet edhe gjatë procesit të apelimit. Duke përjashtuar ndërhyrjen e gjykatës ose një zgjidhje të mëparshme, fatura e tij do të rritet në gjysmë miliard dollarë deri në gusht 2025.
Dënimi bazë ndaj Trump është 355 milionë dollarë, ekuivalenti i asaj që gjykatësi tha se ishin “fitime të paligjshme” nga kursimet në interesat më të ulëta të kredisë dhe fitimet e tij nga falsifikimi i vlerës së bizneseve të tij.
Sipas ligjit të shtetit, atij i ngarkohet një normë vjetore interesi prej 9 për qind.
Që nga e mërkura, Trump duhet të paguajë pak më shumë se 99 milionë dollarë në interesa, duke e çuar totalin e tij gjobës së tij në pak më pak se 454 milionë dollarë (saktësisht 453,981,779 dollarë), sipas përllogaritjeve të agjencisë së lajmeve Associated Press.
Promo
Reklamo këtuLufta Prigozhin - Putin
Më shumëNga Rubrika
![Konferenca e paqes për Ukrainën, Zelensky: Në Zvicër do të shkruhet historia](https://telegrafi.com/wp-content/uploads/2024/06/Screenshot_30-7-380x233.png)
Konferenca e paqes për Ukrainën, Zelensky: Në Zvicër do të shkruhet historia
![Kryeministrja italiane e përshkruan propozimin rus për paqen në Ukrainë si “propagandë”](https://telegrafi.com/wp-content/uploads/2024/06/Screenshot_22-10-380x233.png)
Kryeministrja italiane e përshkruan propozimin rus për paqen në Ukrainë si “propagandë”
![Publikohen rregullat për të cilat Biden dhe Trump kanë rënë dakord për të zhvilluar debatin e parë midis tyre](https://telegrafi.com/wp-content/uploads/2024/06/Screenshot_21-10-380x233.png)
Publikohen rregullat për të cilat Biden dhe Trump kanë rënë dakord për të zhvilluar debatin e parë midis tyre
![Konferenca e paqes për Ukrainën, Zelensky: Në Zvicër do të shkruhet historia](https://telegrafi.com/wp-content/uploads/2024/06/Screenshot_30-7-380x233.png)
Konferenca e paqes për Ukrainën, Zelensky: Në Zvicër do të shkruhet historia
![Publikohen rregullat për të cilat Biden dhe Trump kanë rënë dakord për të zhvilluar debatin e parë midis tyre](https://telegrafi.com/wp-content/uploads/2024/06/Screenshot_21-10-380x233.png)
Publikohen rregullat për të cilat Biden dhe Trump kanë rënë dakord për të zhvilluar debatin e parë midis tyre
![Putin premton paqe me Ukrainën, por Kievi duhet të plotësojë dy kushte](https://telegrafi.com/wp-content/uploads/2024/03/putin-2-380x233.jpg)
Putin premton paqe me Ukrainën, por Kievi duhet të plotësojë dy kushte
![Scholz tregon se pse Gjermania nuk do t’i vendos sanksione të reja Rusisë sikurse SHBA-ja dhe Britania](https://telegrafi.com/wp-content/uploads/2024/06/Screenshot-2024-06-15-125617-380x233.png)
Scholz tregon se pse Gjermania nuk do t’i vendos sanksione të reja Rusisë sikurse SHBA-ja dhe Britania
![Aeroplani luftarak rus futet në hapësirën ajrore të Suedisë](https://telegrafi.com/wp-content/uploads/2024/06/666d635ab992f-380x233.jpg)
Aeroplani luftarak rus futet në hapësirën ajrore të Suedisë
![Konfirmohet numri i mercenarëve të vrarë të Wagnerit në Ukrainë](https://telegrafi.com/wp-content/uploads/2024/06/Screenshot_1-57-380x233.jpg)
Konfirmohet numri i mercenarëve të vrarë të Wagnerit në Ukrainë
![Shitet banesa në Fushë Kosovë në një vendodhje perfekte – 80.5m², çmimi 62,000Euro! ID-254](https://telegrafi.com/wp-content/uploads/2024/02/1a-1-380x233.jpg)
Shitet banesa në Fushë Kosovë në një vendodhje perfekte – 80.5m², çmimi 62,000Euro! ID-254
![Ideale për zyre – në qendër të Prishtinës lëshohet banesa me qira ID-253](https://telegrafi.com/wp-content/uploads/2024/02/DSC00994-380x233.jpg)
Ideale për zyre – në qendër të Prishtinës lëshohet banesa me qira ID-253
![Krijo hapësirën tënde të biznesit – zyre me qira te 4 Llulat – 300€/muaj ID-252](https://telegrafi.com/wp-content/uploads/2024/02/Template-per-Instagram-380x233.jpg)
Krijo hapësirën tënde të biznesit – zyre me qira te 4 Llulat – 300€/muaj ID-252
![Ofertë e veçantë – vila në Brezovicë ofrohet me zbritje ID-246](https://telegrafi.com/wp-content/uploads/2023/11/Foto-Kryesore-4-380x233.jpg)
Ofertë e veçantë – vila në Brezovicë ofrohet me zbritje ID-246
![Një jetë e re fillon këtu – banesa e gatshme 2+1 në rrugën ‘Gazmend Zajmi’ ID-251](https://telegrafi.com/wp-content/uploads/2024/02/Foto-Kryesore-380x233.jpg)
Një jetë e re fillon këtu – banesa e gatshme 2+1 në rrugën ‘Gazmend Zajmi’ ID-251
Më të lexuarat
![Ndeshja Itali 2-1 Shqipëri në numra: Rekord historik, statistika mbresëlënëse dhe uragani kuqezi](https://telegrafi.com/wp-content/uploads/2024/06/itali-380x233.jpg)
Ndeshja Itali 2-1 Shqipëri në numra: Rekord historik, statistika mbresëlënëse dhe uragani kuqezi
![Dominuam tribunën, por jo fushën – Shqipëria pëson ngushtë ndaj kampionit në fuqi të Evropës](https://telegrafi.com/wp-content/uploads/2024/06/shqipnia-380x233.jpg)
Dominuam tribunën, por jo fushën – Shqipëria pëson ngushtë ndaj kampionit në fuqi të Evropës
![Konferenca e paqes për Ukrainën, Zelensky: Në Zvicër do të shkruhet historia](https://telegrafi.com/wp-content/uploads/2024/06/Screenshot_30-7-380x233.png)
Konferenca e paqes për Ukrainën, Zelensky: Në Zvicër do të shkruhet historia
![Sylvinho reagon pas ndeshjes me Italinë: I kënaqur me paraqitjen, por jo me rezultatin](https://telegrafi.com/wp-content/uploads/2023/11/Sylvinho-380x233.jpg)
Sylvinho reagon pas ndeshjes me Italinë: I kënaqur me paraqitjen, por jo me rezultatin
![Kurban Bajrami të dielën, BIK njofton se në sa ora falet namazi](https://telegrafi.com/wp-content/uploads/2023/06/xhamia-380x233.jpg)
Kurban Bajrami të dielën, BIK njofton se në sa ora falet namazi
![Notat e lojtarëve, Itali 2-1 Shqipëri: Shpëtojnë vetëm Bajrami dhe Gjimshiti, Bastoni lojtar i ndeshjes](https://telegrafi.com/wp-content/uploads/2024/06/Screenshot-2024-06-15-231254-380x233.png)
Notat e lojtarëve, Itali 2-1 Shqipëri: Shpëtojnë vetëm Bajrami dhe Gjimshiti, Bastoni lojtar i ndeshjes