Eksperti i sigurisë ndërkombëtare: Kosova s’e ka luksin ta humbë partneritetin me SHBA-në

Eksperti i sigurisë ndërkombëtare, Adrian Shtuni, duke komentuar deklaratat e ndërkombëtarëve se vendimet e fundit të qeverisë kanë ndikuar në partneritetin në mes të Kosovës dhe SHBA-së, ka thënë se Kurti ka hapur beteja nga të gjitha anët.

“Është shumë e qartë, por nuk po kuptohen mesazhet e SHBA-së nga Qeveria e Kosovës. Kosova nuk ka luksin ta humbë partneritetin vital me SHBA-në, si do të luftojë vendi nëpër betejat që ka hapur Qeveria e Kurtit”, tha Shtuni në RTV Dukagjini.

Ai ka theksuar se qasja e kryeministrit Kurti është jo strategjike dhe se nga ana e tij po bëhen autogola të vazhdueshëm.

“Zoti kryeministër ka hapur beteja në të gjitha krahët, dhe nuk e di si do të luftojë Kosova në gjithë këto anë dhe çfarë do të fitojë. Nuk e kemi hallin të pasojat ekonomike, por shikojeni se çfarë lloj qasje jo strategjike, se çfarë lloj gabimi i shumëfishtë, çfarë autogola të vazhdueshëm është duke bërë, nuk e di se për interes të kujt janë. Partneriteti me SHBA-në nuk cenohet, mesazhi ishte i qartë për Qeverinë”, ka deklaruar Shtuni.

Sipas tij, partneriteti me SHBA-në nuk duhet të cenohet.

“Nuk po lexohen mesazhet e SHBA-së… Nëse vazhdon kështu, Qeveria e Kosovës nuk do të trajtohet si një partnere. Kosova nuk e ka luksin të humbë partneritetin vital të SHBA-së. Pse kemi ardhur në këtë pikë, pas dy ditësh do të festojmë 16-vjetorin e Pavarësisë së Kosovës, por nuk e di a na ka mbetur gjë për të festuar në këtë lloj situate”, është shprehur mes të tjerash Shtuni.

Eksperti ka komentuar edhe vizitën e Blinken në Shqipëri dhe porositë që ai dha për rajonin.

“Fokusi do të jetë tek e ardhmja e Shqipërisë dhe Ballkanit Perëndimor, dhe jo nga e kaluara. Takimi me të rinjtë pikërisht dërgoi mesazh, pra u takua me rininë para se të takohej me Ramën, duke dhënë një mesazh simbolik që sytë duhet të jenë nga ardhmja dhe jo nga e shkuara. Pra syri duhet të jetë drejt normalizimit të marrëdhënieve dhe stabilitetit të rajonit, unë mendoj se kjo ishte kryesorja drejt atij mesazhi që është dhënë”, ka thënë Shtuni.