“Munich Security Report 2024” vjen me të dhëna interesante sa i përket luftës në Ukrainë dhe ‘planeve perandorake të Putinit për Evropën Lindore’

Ukrainasit, pavarësisht situatës së vështirë në front, nuk janë të gatshëm të negociojnë paqen me Rusinë sipas kushteve të saj dhe të besojnë në të ardhmen e tyre euroatlantike.

Këto janë rezultatet e një sondazhi që u prezantua në Raportin e Sigurisë së Mynihut 2024, i cili u publikua në Berlin të hënën, më 12 shkurt, sipas Ukrinform, përcjell Telegrafi.

Sipas Indeksit të Sigurisë së Mynihut 2024, për një shumicë dërrmuese të ukrainasve (92%), vetëm një tërheqje e plotë ruse nga të gjitha territoret e tyre, duke përfshirë Krimenë, do të ishin kushte të pranueshme për një armëpushim.

Vetëm 2% janë të gatshëm të mbështesin paqen me kusht që trupat ruse të mbeten në Ukrainë, ndërsa 14% do të pranonin që Rusia të kthehet në vijën e demarkacionit të 24 shkurtit 2022.

Dhe pavarësisht suksesit të kufizuar të kundërofensive të Ukrainës, 80% e qytetarëve ukrainas besojnë se vendi i tyre do ta fitojë luftën.

Ndërkohë, ukrainasit e shohin pa mëdyshje të ardhmen e tyre në Perëndim.

Shumica dërrmuese duan t’i bashkohen BE-së dhe NATO-s (84% dhe 79% respektivisht) dhe shpresojnë ta bëjnë këtë brenda pesë viteve.

Ndërsa tre të katërtat nuk janë kundër një përkeqësimi të përkohshëm të standardit të jetesës me kushtin e anëtarësimit të shpejtë në BE.

Raporti vë në dukje se pavarësisht dështimit të Rusisë për të bërë ndonjë përparim thelbësor ushtarak, Putin nuk po tregon asnjë shenjë se dëshiron të negociojë.

Përkundrazi, Rusia do të shpenzojë më shumë se 7% të GDP-së së saj, ose 29% të të gjitha shpenzimeve qeveritare, në vitin 2024 për mbrojtjen dhe po rrit masivisht prodhimin e saj industrial të mbrojtjes.

Autorët e quajnë Aleksandër Lukashenkon “bashkagresor” të Rusisë, sepse Bjellorusia, e cila është aleati i vetëm i Rusisë në Evropën Lindore, luajti një rol qendror në sulmin e Rusisë ndaj Ukrainës.

Aty thuhet se lufta brutale e Rusisë ndaj Ukrainës nuk lë asnjë dyshim për planet perandorake të Putinit për Evropën Lindore.

Siç theksohet më tej, Kremlini shprehu vizionin e tij për atë që e konsideron si sferën e tij ekskluzive të ndikimit në hapësirën post-sovjetike…, duke përfshirë kërkesën që trupat e NATO-s të tërhiqen nga vendet që i ishin bashkuar Aleancës pas 1997.

Ukraina vlerësohet se është objektivi kryesor i përpjekjeve të Rusisë për të detyruar vendet post-sovjetike të kthehen në orbitën e saj duke kryer “një sërë krimesh lufte” dhe, siç disa argumentojnë, gjenocid. /Telegrafi/