Kurti kujton ushtarët dhe civilët që u vranë në janar të vitit 1999: Përvjetorët na i përtërijnë plagët e luftës

Kryeministri i vendit, Albin Kurti ka kujtuar ushtarët dhe civilët shqiptarë të vrarë në fund të janarit gjatë vitit 1999.

Kurti thotë se përvjetorët na i përtërijnë plagët e luftës, dhe se plagët e krimeve që nuk vjetrohen, transmeton Telegrafi.

“Republika e Kosovës nuk i harron e as nuk i falë krimet e kryera nga Serbia. Më 27, 28 dhe 29 janar të vitit 1999, forcat e armatosura serbe i vranë 30 shqiptarë në Rogovë të Hasit, Goden e Bishtazhin të Gjakovës. Në këtë 25 vjetor i përkujtojmë luftëtarët dhe civilët e rënë për liri, që me sakrificën e tyre e shtruan rrugën deri te ҫlirimi i Kosovës nga Serbia okupatore”, thotë Kurti.

Më tej, Kurti ka shtuar se “atëbotë ranë duke luftuar 21 ushtarë të Ushtrisë Çlirimtare të Kosovës dhe nëntë civilë shqiptarë”.

Në postimin e bërë në Facebook, Kurti ka përmendur ata që kanë rënë në janar.

“Të monumentalizuar në historinë e re të Kosovës, një çerek shekulli më pas i kujtojmë me emrat e tyre të rënët në ato ditë janari: Agim Zeneli, Agron Rama, Agush Gjocaj, Bahtjar Morina, Daut Kelmendi, Emrush Çetaj, Gëzim Ademaj, Gaspër Karaqi, Hamdi Berisha, Haxhi Kleçka, Ilir Merturi, Kasim Shala, Luan Smajli, Memë Lleshi, Naim Dreshaj, Naim Gashi, Prend Lleshi, Sahit Krasniqi, Sejdi Rama, Valon Gashi, Vesel Avdyli, Rrustem Morina, Selman Morina, Muhamet Morina, Nusret Morina, Xhevdet Berisha, Ibrahim Kryeziu, Adem Shala, Zyber Shala dhe Rifat Shala.
Lavdi dëshmorëve dhe martirëve! I përjetshëm qoftë kujtimi për ta”, vijon postimi i tij./Telegrafi/