Ambasadori amerikan në Beograd, zyrtarëve rusë: Janë qesharake pretendimet se Perëndimi inkurajon “Maidan” në Serbi

Ambasadori amerikan në Beograd, Christopher Hill, i sheh si “qesharake” pretendimet e zyrtarëve rusë se Perëndimi po inkurajon një “revolucion me ngjyrë” ose “Maidan” në Serbi dhe shtoi se “askush nuk po inkurajon një revolucion”.

Hill tha për “Blic”-in serb se SHBA e ka të qartë se zgjedhjet e kaluara kanë treguar mangësi në proceset zgjedhore në Serbi, të cilat duhet të zgjidhen.

Lexo po ashtu Protestat e opozitës, pushteti serb i krahason me ato në Kiev - reagon ashpër ambasada ukrainase në Beograd

“Komuniteti ndërkombëtar, duke përfshirë OSBE-në, është i gatshëm të ndihmojë. Por, përparimi demokratik i Serbisë në fund të fundit varet nga qytetarët e saj. I vetmi aktor ndërkombëtar që qëndron në rrugën e përparimit është Rusia – as Amerika, as Evropa, dhe askush tjetër në Perëndim”, tha ambasadori.

Ai vlerësoi se Rusisë i kanë mbetur pak miq, veçanërisht në Evropë, dhe kjo është arsyeja pse ajo vendosi t’i përdorë zgjedhjet në Serbi “në një përpjekje të dëshpëruar për të mbetur aktuale”, si dhe në këtë mënyrë po përpiqet të krijojë një “përçarje mes Serbisë dhe partnerët euroatlantik”.

Lexo po ashtu Deputeti i Bundestagut: Nuk është më i mundur bashkëpunimi i Gjermanisë me këtë lloj qeverie në Serbi, Vuçiq ka humbur kredibilitetin

“Gjithçka që i ofrojnë Serbisë është jo stabiliteti dhe e kundërta e progresit”, tha ambasadori amerikan, shkruan danas.

Ndryshe, opozita po konteston rezultatet e zgjedhjeve të fundit komunale, rajonale dhe parlamentare pasi kishte blerje të votave prej partisë në pushtet SNS, e cila ishte udhëhequr kohë më parë nga presidenti serb, Aleksandar Vuçiq. /Telegrafi/