Vesa dhe Big Basta të zhgënjyer nga Festivali i RTSh-së: E dinim që votat e publikut nuk tregohen, do donim të kishim si befasi transparencën këtë vit

Të premten (22 dhjetor) përfundoi edicioni i 62-të i Festivalit të Këngës në Radio Televizionin Shqiptar.

Fitues i këtij edicioni u shpall këngëtari i ri, Mal Retkoceri, me këngën “Çmendur”.

Ndërkohë, më e votuara nga publiku e cila do ta përfaqësojë edhe Shqipërinë në Eurovision 2024, u shpall këngëtarja Besa Kokëdhima me “Zemrën n’dorë”.

Pjesëmarrës në këtë edicion ishte edhe çifti Vesa Luma & Big Basta me këngën e tyre “Mbinatyrale”.

Lexo po ashtu “Mbinatyrale” - Big Basta dhe Vesa Luma me interpretim të shkëlqyer në natën e dytë të Festivalit të Këngës në RTSh

Ata bënë një postim të gjatë në rrjete sociale duke shprehur pakënaqësitë rreth Festivalit, por duke falënderuar të gjithë ata që i përkrahën në këtë rrugëtim.

Postimi i plotë (pa ndërhyrje):

“Edhe një diçka të fundit para se ta përmbyllim me Fest 62 për të gjithë ju që vazhdoni na shkruani e na emociononi pafund mesazhet më të bukura që kemi marrë ndonjëherë.

Nga momenti që kemi vendosur të hyjmë në garë e kemi ditur që është vetë institucioni që zgjedh nga dëshira anëtarët e jurisë, dhe e dinim që nga vitet e mëparshme që votat e publikut nuk tregohen, e as të jurisë..(prandaj nuk na e bën me të futme) sepse ishim plotësisht të vetëdijshëm.

A do donim të kishim si befasi transparencën këtë vit?

Patjetër që po..por..

E kemi shfrytëzuar platformën e Festivalit duke e ditur që ndiqet nga miliona shikues, e kemi shijuar performancën bashkë me duartrokitjet tuaja dhe kemi pas fatin që të merren me 300 vetë me ne me javë të tëra.

Mbinatyrale tejkaloi pritshmëritë tona edhe pse e kishim mirëmendu çdo gjë deri te krijimi i këngës bashkë me Alban Kondin dhe Fabian Bashën.

është kënga e vetme e Festivalit që po këndohet, dhe që të mos jem më modeste (se më akuzojnë shoqëria e familja për këtë fakt)

Për herë të parë mendimi im personal dhe profesional bashkohen për mbinatyralen.

Ishte pa dyshim kënga me tekstin dhe muzikën më të mirë në Fest 62″. /Telegrafi/