Gara me vetura që la të vdekur tre të rinj, i kushton me ndërrim pozite komandantit të Trafikut Rajonal në Prizren

Gara me vetura që ndodhi të shtunën në autostradën “Ibrahim Rugova” la të vdekur tre të rinj nga komuna e Gjakovës.

Ata u goditën nga njëra prej veturave që po garonte me një veturë tjetër.

E kjo garë e jashtëligjshme që u zhvillua i ka kushtuar me ndërrim pozite edhe komandantit të Trafikut Rajonal në Prizren, Hasan Tërshana.

Lajmin për ndërrimin e pozitës brena stacionit policor në Prizren, e ka konfirmuar për Telegrafin vetë Tërshana.

“Po më është ndërruar pozita, dje kam pranuar vendimin e Drejtorit të Përgjithshëm. Unë do t’i shfrytëzoj të drejtat e mia ligjore, sepse vendimi nuk është i drejtë. Aksidenti ku ka ndodhur është me një zonë që nuk është nën mbikëqyrjen e njësisë së trafikut rajonal të Prizrenit”, ka thënë Tërshana.

Ai ka shtuar se me autostradat merret Njësia e autostradave e jo ajo e Trafikut.

“Njësia e Autostradës menaxhon me autostradat e jo Njësia e Trafikut. Ne i kem rezultat e performancës më të mirat dhe për mua ka qenë shumë e papritur, por do t’i ndjek rrugët ligjore”, u shpreh Tërshana.

Lexo po ashtu Aksidenti tragjik në autostradën “Ibrahim Rugova”, Sveçla: Të njëjtit grup policia ia kishte parandaluar dy herë organizimin e garave me vetura

Tërshana shtoi se me vendimin për ndërrim të pozitës ai tani do të jetë pjesë e Sektorit Operativ.

“Kam qenë shef i Njësisë së Trafikut dhe tash jam në Sektorin e Planifikimeve Operative”, u shpreh ai.

Ndryshe, nga gara me vetura që u mbajt të shtunën në mbrëmje, në Autostradën “Ibrahim Rugova”, mbetën të vdekur tre të rinj: Lordon Syla, Molos Delija dhe Nue Bibaj.

E për këtë aksident ka folur sot edhe ministri i Punëve të Brendshme, Xhelal Sveçla. Ministri bëri të ditur se në aksidentin e së shtunës, tre qytetarë humbën jetën si pasojë e mbajtjes së garave të jashtëligjshme automobilistike.

“Në rastin e të shtunës, Policia e Kosovës të njëjtit grup ia kishte parandaluar dy herë organizimin e garave të tilla. Të njëjtit kanë pasur gjoba të njëpasnjëshme për tejkalim shpejtësie e rrezikim, dhe njërit prej tyre i është konfiskuar patentë shoferi për tejkalim shpejtësie dhe filmim e publikim të këtyre garave”, tha Sveçla. /Telegrafi/