Narko-bosi italian e jep ishullin në Dubai në këmbim të zbutjes së dënimit me burg, kap vlerën e 80 milionë eurove

Rafaele Imperiale, një trafikant droge i shndërruar në informator, i ka dorëzuar autoriteteve italiane një ishull artificial që zotëron në brigjet e Dubait, me shpresën se do të marrë dënim më të vogël me burg.

Ky informacion u publikua gjatë gjyqit në Napoli të hënën. Fjala është për procesin gjyqësor në të cilin akuzohen rreth 20 të pandehur, përfshirë Imperiale, i njohur si Boss dei Van Gogh (Il boss dei Van Gogh), një trafikant famëkeq ndërkombëtar droge që ishte bosi i Camorra, një organizatë kriminale napolitane.

Ai ishte në arrati për pesë vjet dhe u arrestua në Dubai në gusht 2021, dhe u ekstradua në Itali në mars të vitit të kaluar, transmeton Telegrafi.

Sipas hetuesve, ai bleu një ishull të quajtur Tajvan ndërsa ishte fshehur. Vlera e ishullit vlerësohet nga 60 deri në 80 milionë euro, dhe është pjesë e një arkipelagu artificial në brigjet e Emirateve të Bashkuara Arabe të quajtur Bota dhe i formuar si një hartë e globit.

Guardian shkruan se Imperiale po përpiqet të tregojë gatishmërinë e tij për të bashkëpunuar me autoritetet me shpresën për të marrë një dënim më të vogël.

“Është e qartë se Imperiale kërkon një dënim më të lehtë. Ne po vlerësojmë vlefshmërinë e deklaratave të tij, por duket se nuk ka dyshim për vërtetësinë e tyre”, tha prokurori Mauricio de Marco.

Imperiale e filloi karrierën e tij kriminale në një kafene në Amsterdam, ku shiste kanabis.

Ai besohet të ketë qenë lideri i një superkarteli të supozuar të drogës, së bashku me ish-kriminelin holandez më të kërkuar Riduan Taghi dhe bosin e bandës irlandeze Daniel Kinahan.

Daniel Kinahan, babai i tij Christopher dhe vëllai i tij Christopher Jr janë ende të lirë, pavarësisht një shpërblimi prej 5 milionë dollarësh për arrestimin e tyre.

Autoritetet italiane e konsiderojnë këtë grup kriminal një nga 50 kartelet më të mëdha të drogës në botë, me monopolin e kokainës peruane.

Imperiale, i cili gëzonte një mënyrë jetese luksoze në Dubai dhe shpenzonte 400 mijë euro në muaj, fitoi pseudonimin Boss Van Gogh sepse zotëronte dy piktura të vjedhura, me vlerë të artistit holandez.

Për të demonstruar gatishmërinë e tij për t’u bërë informator, Imperial ua ktheu fotografitë autoriteteve gjyqësore. /Telegrafi/