Greenwood shënon një gol të jashtëzakonshëm, ndoshta më të mirin në karrierën e tij

Mason Greenwood ka shënuar një ndër golat më të bukur në karrierën e tij pas një gjuajtje fantastike nga distanca në duelin mes Getafes dhe Almerias.

22-vjeçari dribloi një mbrojtës dhe lëshoi një goditje të pandalshme për të barazuar rezultatin në 1-1 në ndeshjen që u zhvillua në “Estadio Coliseum”.

Ky ishte goli i tij i katërt me fanellën e klubit madrilen që prej se iu bashkua atyre në formë huazimi për sezonin 2023/24 nga Manchester United këtë verë.

Greenwood është rikthyer për të luajtur futboll pas më shumë se një viti larg fushave të futbollit, pasi u pezullua nga United në janar të vitit të kaluar për shkak të arrestimit nën akuzat për përdhunim dhe sulm ndaj të dashurës së tij.

🚨🚨| Mason Greenwood scores a wonder goal for Getafe. pic.twitter.com/eU81o3g7V8

— centredevils. (@centredevils) November 25, 2023

Këto akuza u tërhoqën në shkurt të vitit 2023, por United i tha atij të kërkonte një klub të ri për të vazhduar karrierën e tij.

Ai tani ka filluar të shkëlqejë në fushë për Getafen duke i bërë drejtuesit e “Djajve të Kuq” të mendojnë nëse vendimi për ta larguar atë ishte i duhuri.

Xhiron e radhës Greenwood dhe Getafe do të përballen ndaj Las Palmas, ndërsa sa i përkët të ardhmes së tij me United, momentalisht nuk duket i mundur një rikthim i tij në Angli teksa kujtojmë që kontrata e tij skadon në vitin 2025./Telegrafi/