“Nuk më pëlqejnë 80 për qind e gjyqtarëve anglezë”, De Zerbi i irritur me gjykimin më Ligën Premier

Trajneri i Brightonit, Roberto De Zerbi është shprehur i pakënaqur me ndarjen e drejtësisë në Ligën Premier, duke fajësuar shumicën e gjyqtarëve.

Barazimi 1-1 i Brightonit kundër Sheffield United në ndeshjen e fundit në Ligën Premier ka lënë shije të hidhur te vendasit, me trajnerin italian që është ndarë i pakënaqur me ndarjen e drejtësisë.

“Unë jam i sinqertë dhe i qartë, nuk më pëlqejnë 80 për qind e gjyqtarëve anglezë”, ka thënë fillimisht De Zerbi pas barazimit 1-1 kundër Sheffield United.

“Nuk është një gjë e re, nuk më pëlqejnë ata. Sjellja, nuk më pëlqen sjellja e tyre në fushë. Anglia është i vetmi vend ku, kur ka VAR, nuk je i sigurt se është vendimi i drejt”.

“Në vende të tjera, ju duhet të jeni i sigurt se gjyqtari ka 100 për qind të drejtë. Në Angli, jo, nuk jam në gjendje ta kuptoj këtë”, përfundoi trajneri italian.

Lexo po ashtu Guardiola e di se kush do të jetë trajneri i ardhshëm i Man Cityt

Ankesa e De Zerbit mund të jetë ndikuar nga një karton i kuq për Mahmoud Dahoud në minutën e 69-të të ndeshjes. Pulëbardhat kishin pasur kontrollin përpara largimit, por, të mbetur me 10 lojtarë, pranuan golin e barazimit dhe ndoshta ishin me fat që morën ndonjë pikë në fund.

Sa i përket De Zerbit, ai ka një marrëdhënie të ashpër me gjyqtarët anglezë. Italiani është shumë i zhurmshëm në bankinë, gjë që shpesh çon në ndëshkim.

Sezonin e kaluar, ai mori dy kartonë të kuq (dhe katër të verdhë), më shumë se të gjithë lojtarët e tij të Brighton së bashku. /Telegrafi/