Haradinaj-Stublla: Zbatimi i Asociacionit pa njohjen de-jure nga Serbia, nënkupton zgjerimin e ndikimit rus dhe legalizimin e strukturave paralele

Ish-ministrja e Punëve të Jashtme të Kosovës, Meliza Haradinaj-Stublla, ka komentuar zhvillimet e fundit në procesin e dialogut, pas takimeve të 26 shtatorit në Bruksel.

Haradinaj-Stublla ka thënë se implementimi i çfarëdo versioni të Asociacionit, pa njohjen de-jure të Serbisë, do të thotë zgjerim i ndikimit rus dhe legalizim i strukturave paralele serbe.

Ajo në një postim në platformën “X” ka shkruar se e tërë kjo do të sillte ndarje pas disa vitesh.

Lexo po ashtu Liderët evropianë me letër të përbashkët: Kosova ta bëjë Asociacionin, Serbia njohjen de-facto

“Implementimi i ‘Asociacionit’ (çdo version) pa njohjen de-jure nga Serbia (në këtë rast do të përcaktoheshin edhe kufijtë e nënshkruar në Bruksel në vitin 2011) do të thotë:

1.Zgjerimi i epiqendrës së ndikimit rus edhe brenda Kosovës;

2.Legalizimi i institucioneve paralele serbe aktualisht ilegale në Kosovë, dhe

3.Prelud i ndarjes pas disa vitesh!”, ka shkruar Haradinaj-Stublla.

Kujtojmë se pas takimeve të fundit në Bruksel, kancelari gjerman, Olaf Scholz, presidenti francez, Emmanuel Macron dhe kryeministrja e Italisë, Giorgia Meloni përmes një letre kanë dalë me kërkesa të drejtpërdrejta për Kosovën dhe Serbinë.

Ata kërkuan që Kosova të nisë me procedurat për themelimin e Asociacionit të komunave me shumicë serbe, sipas draft-statutit të propozuar nga pesëshja perëndimore më 21 tetor, ndërkaq Serbia realizojë njohjen de-facto. /Telegrafi/

❌Implementation of the ‘association’ (any version) without the de-jure recognition by #Serbia (in which case the borders signed in Brussels in 2011 would also be defined) will mean:

1. Expansion of the epicenter of #Russian influence also within #Kosovo;

2. Legalization of…

— Meliza Haradinaj (@MelizaHaradinaj) October 29, 2023