Aktivitetet e papritura që mund të nxitin një sulm në zemër

Ndryshimet në enët e gjakut janë shkaku kryesor i një ataku kardiak dhe ato mund të jenë njëlloj të pranishme te të dyja gjinitë dhe në mosha të ndryshme.

Sëmundjet kardiovaskulare janë shkaku kryesor i vdekjeve në botë dhe njohja e simptomave do t’ju ndihmojë t’i parandaloni këto sëmundje. Në mes të stresit apo gëzimit të tepërt, është e mundur të përjetoni një sulm në zemër, por nuk mund të themi se janë shkaktari kryesor i kësaj gjendjeje.

Lexo po ashtu Urth apo sulm në zemër? Ja kur duhet të kërkoni ndihmë urgjente mjekësore për shkak të dhimbjes së barkut

Megjithatë, duhet të mendoni përpara se të bëni disa nga aktivitetet e mëposhtme nëse jeni në grupin e rrezikut:

Ngritja nga shtrati në mëngjes

Sulmet në zemër ndodhin më shpesh në mëngjes. Kjo është për shkak se truri juaj mbush trupin me hormone për t’ju ndihmuar të zgjoheni, por kjo e ngarkon zemrën tuaj shtesë. Ajo që mund të shkaktojë edhe atak në zemër gjatë zgjimit është dehidrimi, por edhe ngritja e shpejtë nga shtrati.

Mungesa e gjumit

Gjumi i rregullt dhe cilësor është i domosdoshëm për organizmin e njeriut dhe nëse nuk flini mjaftueshëm, mund ta rritni rrezikun e një ataku kardiak. Mungesa e gjumit mund ta rritë presionin e gjakut, por edhe të çojë në inflamacion. Gjumi duhet të zgjasë të paktën gjashtë deri në tetë orë çdo natë, në mënyrë që ta reduktoni rrezikun e sëmundjeve të ndryshme.

Ngrënia e tepërt

Është e qartë se një vakt i madh nuk mund të shkaktojë atak në zemër, veçanërisht nëse jeni një person që nuk rrezikohet nga sëmundjet kardiovaskulare. Megjithatë, nëse jeni në grupin e rrezikut, një vakt i madh dhe i rëndë mund ta rritë nivelin e hormoneve dhe ritmin e zemrës, duke shkaktuar kështu një sulm në zemër.

Përpjekje e menjëhershme ose intensive

Të qenit në formë do ta mbrojë zemrën tuaj në planin afatgjatë, por stërvitja e tepërt mund të jetë e rrezikshme. Rreth gjashtë për qind e sulmeve në zemër shkaktohen nga sforcimet ekstreme fizike.

Lexo po ashtu Çfarë duhet bërë në rast të një ataku kardiak? Ekziston një metodë që mund t'ju shpëtojë jetën

Seksi

Ashtu si shumë forma të ushtrimeve, aktiviteti seksual lidhet me një rrezik të shtuar të sulmit në zemër. Megjithatë, ky aktivitet nuk është i rrezikshëm nëse jeni fizikisht aktiv dhe i shëndetshëm.

Shikimi i ndeshjeve

Marrja me sport mund të shkaktojë një atak në zemër, por edhe shikimi i tyre. Sipas WebMD, një studim i vitit 2006 zbuloi se sulmet në zemër në Gjermani u shtuan gjatë Kampionatit Botëror. /Telegrafi/