Haliti: Marrëveshja e 2013-ës e ka brenda njohjen “de-fakto”, por nuk po duan ta pranojnë

Deputeti i Partisë Demokratike të Kosovës (PDK), Xhavit Haliti, duke komentuar takimin e 14 shtatorit të nivelit të lartë në kuadër të dialogut Kosovë-Serbi, ka thënë se marrëveshja e arritur mes palëve në vitin 2013 e ka njohjen “de-fakto”.

“Marrëveshja e vitit 2013, për ata që dinë të lexojnë politikisht, në mes rreshtave, në vetvete e ka njohjen ‘de-fakto’. Por, fatkeqësisht nuk po duan ta pranojnë”, ka shkruar Haliti në Facebook.

Ai tutje ka thënë se zvarritja e fillimit të zbatimit të marrëveshjes për normalizimin e marrëdhënieve mes dy vendeve, nuk është në favor të Kosovës.

“Obligimet që kanë marrë të dyja vendet, nëse nga të dyja palët ka gatishmëri që të zbatohen obligimet, procesi në vetvete do jetë njohja reciproke e padeklaruar. Prolongimi i fillimit të zbatimit të marrëveshjes nuk shkon në favor të Kosovës”.

“Më vjen keq që po zhvillohet fushatë e qëllimshme servilosje për ta futë sa më thellë në gabime zotin Kurti, pasojat e së cilës na shpijnë në rrugë pa krye. Prandaj, mendoj që në bisedime duhet të jemi largpamës për të ardhmen e vendit dhe të rajonit”, ka përfunduar Haliti. /Telegrafi/