Qeveria gjermane nuk arrin të pajtohet për subvencionimin e energjisë elektrike

Qeveria e koalicionit të majtë-liberal të Gjermanisë nuk arriti të merrte një vendim për subvencionimin e energjisë elektrike gjatë takimit në Meseberg.

Një propozim nga Ministria e Ekonomisë dhe Klimës e udhëhequr nga të Gjelbrit për të kufizuar çmimet në 6 cent për KWh për industri të caktuara, nuk mund të fitonte mbështetjen e kancelarit Olaf Scholz.

Duke folur me gazetarët, Scholz tha se Qeveria ka ndërmarrë tashmë përpjekje serioze për të siguruar një furnizim të qëndrueshëm dhe të përballueshëm me energji.

“Fakti që vepruam kaq herët na ndihmoi të kalonim dimrin dhe nuk bëri ftohtë në shtëpitë dhe fabrikat tona, dhe ekonomia ishte në gjendje të vazhdonte të funksiononte”, tha Schols, duke iu referuar masave të qeverisë për të zëvendësuar importet ruse të energjisë dhe për të nxitur alternativat e rinovueshme.

“Dhe ne shpenzuam shumë para për ta subvencionuar këtë, shumë miliarda, pasi rritja e çmimit ishte e dukshme kudo gjatë asaj kohe. Tani po shohim që çmimet po bien sërish”, shtoi ai.

Socialdemokrati Scholz nënvizoi se çmimet e importit të Gjermanisë panë një rënie të ndjeshme në korrik, duke treguar se rënia e çmimeve të energjisë ka një ndikim pozitiv tek kompanitë.

“Kostot e përgjithshme të importit për Gjermaninë po bien dhe ky është rezultat i strategjisë që kemi zhvilluar. Dhe strategjia jonë synon të sigurojë kosto të ulëta të energjisë elektrike në Gjermani duke zgjeruar energjitë e rinovueshme me një ritëm edhe më të shpejtë”, theksoi kancelari gjerman.

Më parë, ministri i Financave, Christian Lindner hodhi poshtë planet e të Gjelbërve për të subvencionuar energjinë elektrike të përdorur nga kompanitë industriale.

Ai argumentoi se një masë e tillë do të binte ndesh me parimet e ekonomisë sociale të tregut dhe do të ishte veprim “ekonomikisht jo i mençur”. /Telegrafi/