Dreshaj i AAK-së për librat: Të paaftë për të qeverisur, vetëm sa e rëndon skamjen e shumë familjeve

Deputeti i Kuvendit nga radhët e AAK-së, Shemsedin Dreshaj, ka thënë se kjo që po ndodh me arsimin në Kosovë, nuk mbahet mend të ketë ndodhur ndonjëherë pas luftës, kjo si pasojë e njerëzve të paaftë në qeverisje.

Dreshaj ka thënë se qeveria po bënë lojë me emocionet e fëmijëve dhe me skamjen e familjarëve e gatishmërinë e mësimdhënësve.

“Dështimi i radhës i qeverisë, lajm i hidhur për nxënës, prindër e mësimdhënës. A thua pse edhe sivjet lojë me emocionet e fëmijëve, me skamjen e familjarëve dhe me gatishmërinë e mesimdhënësve, përkundër shumë pakënaqësive, që ky vit të fillojë me kohë”.

Lexo po ashtu Shtëpia Botuese Dukagjini: Kemi ofertuar më lirë se vitin e kaluar

“Cilat qenkan prioritetet menaxhuese të këtij vendi: shkollat e parinovuara, tekstet mësimore te pakontraktuara, mësues e nxënës në shtëpi. Kjo nuk ka ndodhur asnjëherë pas lufte e madje as gjatë viteve të okupimit, viteve të 90-ta. Krejt kjo si pasojë e paaftësisë së njerëzve që sot qeverisin me vendin”, ka thënë Dreshaj.

Ai ka shtuar se qeveria Kurti e ka vra shpresën dhe ardhmërinë e rinisë.

“Si duket arsimin e kemi shumë mirë. Ky vend nuk paska nevojë për shkolla, as për tekste mësimore e madje as për mësimdhënës. Arsimi lehtë shkatërrohet, por vështirë riparohet. E vrave shpresën dhe ardhmërinë e rinisë, populli dhe vendi gjykohen në vdekje. Ju lus veproni, me fëmijë nuk bëhet eksperiment”, është shprehur Dreshaj.