Sport Futboll Ndërkombëtare

Allegri ‘skanon’ Juventusin e tij para se të fillojë kampionati: Objektivat, kandidatët dhe lojtarët aktual

Para 1 viti

Trajneri i Juventusit, Massimiliano Allegri është i kënaqur me përmirësimet e gjendjes fizike të Federico Chiesa dhe Paul Pogba, por Arek Milik do të humbasë ndeshjen e nesërme në Serie A kundër Udineses.

Bianconerët po përgatiten për ndeshjen e parë të sezonit në Serie A që zhvillohet në “Dacia Arena” në Udine.

“Jam i kënaqur me skuadrën aktuale, djemtë po punojnë shumë mirë. Ndeshjet do të jenë të ndryshme nga nesër, dhe ne do të shohim se ku mund të arrijmë. Ekipi ka hapësirë të mjaftueshme për përmirësim dhe ne duhet të përfundojmë në top katërshen”, ka thënë Allegri në konferencën e tij të parë për shtyp.

🗣 Coach Allegri previews #UdineseJuve, our opening fixture of the 2023/24 campaign: ⤵️ pic.twitter.com/TKzdQYGGs4

— JuventusFC 🇬🇧🇺🇸 (@juventusfcen) August 19, 2023

Juventusi u përjashtua nga Liga e Konferencës për parregullsi financiare, ndaj do të luajë vetëm në Serie A dhe Kupën e Italisë këtë sezon.

“Teknikisht mënyra jonë e punës do të ndryshojë, është e hidhur të mos luajmë në Ligën e Kampionëve, unë kam qenë në këtë garë për 14 vjet. Ne duhet të bëjmë më të mirën për t’u kualifikuar dhe për të luajtur në Ligën e Kampionëve sezonin e ardhshëm”, deklaroi ‘timonieri’ italian .

Allegri foli edhe për marrëdhëniet me Cristiano Giuntoli, që u emërua drejtor i ri sportiv i klubit disa muaj më parë, duke thënë se me të dhe Giovanni Mannan, ka bashkëpunim të mirë.

Tutje ai u ndal te lojtarët, sidomos te Federico Chiesa, i cili nuk luajti vazhdimisht sezonin e kaluar për shkak të problemeve të përsëritura fizike.

“Chiesa është më i vetëdijshëm dhe më i qetë se sezonin e kaluar. Ai kishte një vit të vështirë dhe tani këmbët e tij janë të ndryshme. Vlahovic ka pasur ulje dhe ngritje, ai kishte probleme me ijë këtë verë, por tani ndihet më mirë. Ai nuk është plotësisht në formë, ku humbi disa ndeshje gjatë para-sezonit. Milik nuk do të jetë i disponueshëm. Kemi Yildizin që vjen nga sektori i të rinjve dhe është shumë i mirë. Jam i lumtur me sulmuesit e mi”, deklaroi Allegri.

Pogba shënoi në një miqësore kundër Alessandria në fillim të kësaj jave dhe mund të thirret për ndeshjen në Udine.

“Jam gjithashtu i lumtur me ditët e fundit të Paul. Ai është një lojtar i ndryshëm nga të tjerët, por nuk ka luajtur për një vit e gjysmë. Do të ishte ideale ta kishim në dispozicion çdo ditë. Shpresojmë që gjendja e tij të përmirësohet. Sot do të vendos nëse ai do të vijë në Udine”, nënvizoi trajneri i njohur.

Në fund ai foli edhe për kandidatët për titull, duke e cilësuar Napolin si më të fortin pasi është kampion në fuqi.

“Kampionët në fuqi janë favoritë, kështu që Napoli. Interi është i fortë, njëlloj si Milani dhe Lazio, por ne nuk kemi filluar ende. Sigurisht që duhet të përmirësohemi në ndeshjet jashtë fushe. Napoli grumbulloi 15 pikë më shumë se ne jashtë fushe sezonin e kaluar”, përfundoi Allegri. /Telegrafi/