Ukraina nuk do ta zgjasë marrëveshjen me Rusinë për tranzitin e gazit në Evropë

Ukraina ka refuzuar negociatat me Rusinë për të zgjatur kontratën rreth kalimit të gazit rus, e cila mbaron vitin e ardhshëm.

Këtë e ka konfirmuar ministri ukrainas i Energjisë, Herman Halushchenko, i cili deklaroi se viti i ardhshëm do të dëshmojë nëse evropianët mund të bëjnë pa gazin rus

“Ne sigurisht nuk do të marrim pjesë në negociatat me rusët, kjo është mjaft e qartë. Viti i ardhshëm do të tregojë nëse Evropa mund të bëjë pa gazin rus. Unë i shoh të gjitha parakushtet që kjo të ndodhë”, tha ai.

Në këtë, Halushchenko kujtoi deklaratën e mëparshme të Komisionerit Evropian për Energjinë, Kadri Simson, sipas të cilit Evropa dëshiron të heqë qafe plotësisht gazin rus. Ministri theksoi gjithashtu se është shumë herët për të parashikuar se çfarë do të ndodhë vitin e ardhshëm për shkak të “politikës së paparashikueshme agresive” të Rusisë.

“Kemi të bëjmë me rusët, të cilët mund ta ndërpresin këtë marrëveshje në çdo moment. Është absolutisht e qartë se kjo nuk ka të bëjë me formalitetet ligjore”, shtoi ministri, raporton ukrainenews.

Lexo po ashtu Ukraina shfaq tanket e reja që i mori nga Gjermania

Sipas tij, Ukraina mund të luajë një rol të rëndësishëm në sigurimin e stabilitetit të tregut të gazit në Evropë në dimrin e ardhshëm. Pavarësisht luftës, kompanitë evropiane vazhdojnë të ruajnë gazin në rezervuarët ukrainas dhe ky trend vetëm do të rritet, tha ministri.

“Jam i sigurt se tashmë muajin e ardhshëm do të ketë një rritje të rezervave të gazit, që do të thotë se Ukraina është një partner i besueshëm i tplp, luftës. Ukraina është në gjendje të garantojë siguri për furnizimin për Evropën dhe kjo është e rëndësishme”, përfundoi ai. /Telegrafi/