Osmani dhe ambasadori amerikan flasin për bashkërendimin e aktiviteteve për shtensionimin e situatës në veri

Presidentja e Kosovës, Vjosa Osmani ka pritur sot në takim ambasadorin e Shteteve të Bashkuara, Jeffrey Hovenier, me të cilin bisedoi për zhvillimet në vend, me fokus të veçantë në procesin e dialogut ndërmjet Kosovës dhe Serbisë.

Në njoftimin nga Presidenca, thuhet se në takim u diskutua edhe për vazhdimin e bashkërendimit me partnerët, duke e ditur që si institucionet tona ashtu edhe SHBA-të, kanë të njëjtin qëllim për shtensionimin e situatës në veri të vendit.

Edhe kryetari i Partisë Demokratike të Kosovës, Memli Krasniqi ka pritur sot ambasadorin Hovenier me të cilën kanë biseduar për situatën aktuale politike dhe qëndrimet e PDK-së.

Krasniqi përmes një postimi në rrjetin social në Facebook ka shkruar se për PDK-në, veprimet e njëanshme dhe të pakoordinuara të Qeverisë së Kosovës, janë tërësisht të papranueshme.

Sipas tij, ky nuk është vullneti i qytetarëve dhe ajo për të cilën ata kanë votuar.

“Ambasadorit amerikan i shpreha qëndrimin që Kosova të mos vuaj masa ndëshkuese për shkak të kryeneçësisë politike të një individi”, ka thënë Krasniqi. /Telegrafi/