Deshi ta vë në gjumë foshnjën, nëna amerikane i fut drogë në shishen e qumështit – humb jetën nga doza që mund të mbyste dhjetë persona

Policia amerikane në Florida ka njoftuar se një djalë nëntë muajsh ka vdekur, pasi nëna e tij e mitur derdhi drogën fentanil në shishen e foshnjës.

New York Post raporton se foshnja u gjet pa shenja jete apo pa puls në një shtëpi në qytetin e Callahan më 26 qershor, pas së cilës nisi një hetim, transmeton Telegrafi.

“Zëvendësit e sherifit që mbërritën atje u përpoqën të rikthejnë në jetë foshnjën duke i dhënë frymëmarrje artificiale, por vdiq më vonë në spitalin në Jacksonville”, tha Bill Leeper, Sherif i Qarkut Nassau.

Nëna 17-vjeçare e fëmijës thuhet se fillimisht u tha hetuesve se nuk e dinte se çfarë kishte ndodhur, por e ndryshoi historinë e saj gjatë intervistave të mëpasshme të policisë në javët në vijim.

Në fund, autopsia zbuloi se fëmija kishte mjaftueshëm fentanil në trup sa për të mbytur dhjetë persona.

“Kush e bën këtë gjithsesi? Cila nënë do ta bënte këtë? Kjo nuk është normale. Kjo është e sëmurë. As që mund ta imagjinoj pse një nënë do t’ia bënte një gjë të tillë fëmijës së saj”, tha Liper në një konferencë për media të mbajtur të mërkurën dhe shtoi se “askush nuk duhet të humbë jetën për shkak të një ilaçi të tmerrshëm vdekjeprurës, veçanërisht jo një foshnjë e pafajshme”.

Nëna akuzohet për vrasje të rëndë nga pakujdesia dhe posedim të substancave të ndaluara. /Telegrafi/