PDK akuzon Qeverinë për manipulim me të dhënave të tregut të punës

Partia Demokratike e Kosovës (PDK) ka akuzuar Qeverinë për manipulime me shifrat e të punësuarve.

Koordinatori i Departamentit për Financa në Kabinetin për Qeverisje të Mirë në PDK, Arben Mustafa përmes një postimi në Facebook ka akuzuar Qeverinë se qëllimshëm ka ndërprerë publikimin e Anketës së Fuqisë Punëtore.

“Qeveria Kurti, përmes Agjencisë së Statistikave të Kosovës, ka kohë që ka ndërprerë publikimin e Anketës së Fuqisë Punëtore, e cila paraqet burimin kryesor të të dhënave të tregut të punës. Kjo ndërprerje skandaloze e këtij publikimi kaq të rëndësishëm ka ndodhur pa asnjë shpjegim për publikun”.

“Në vend të këtij publikimi, Qeveria Kurti filloi të improvizojë me statistikat e tregut të punës duke shfrytëzuar të dhënat e kontribuuesve pensionalë në Trust dhe të tatimpaguesve në ATK, sepse në periudhën kur jepeshin subvencione të ndryshme për punëtorët këto figura rriteshin dhe Qeveria në mënyrë manipulative i paraqiste si punësime të reja”.

Mustafa thotë se krahasuar me vitin e kaluar numri i llogarive aktive në Trust është zvogëluar për 100 mijë.

Lexo po ashtu Murati mohon se është zvogëluar numri i të punësuarve: Janë rreth 7 mijë më shumë se vitin e kaluar

“Ndërsa, tani kur numri i llogarive aktive në Trust është zvogëluar për 100,000 krahasuar me fundin e vitit paraprak shtrohet pyetja se çka po ndodhë me ato vende të punës që Qeveria pretendonte se po krijohen?!”

Zyrtari i PDK-së thotë se kjo qeveri po tenton ta zgjidhë problemin e papunësisë në vend përmes disa subvencioneve të përkohshme.

“Kjo është vetëm një evidencë shtesë për qasjen amatoreske të një qeverie populliste e cila pretendonte se po e zgjidhë problemin e papunësisë në vend përmes disa subvencioneve të përkohshme”, ka shkruar tutje Mustafa./Telegrafi/