Gara presidenciale e Turqisë do të vendoset në balotazh

Presidenti i Turqisë, Recep Tayyip Erdogan, do të shkojë ballë për ballë me rivalin e tij të opozitës në një balotazh, ka konfirmuar këshilli suprem i zgjedhjeve.

Siç raporton BBC, Erdogan kryesoi raundin e parë me 49.51% të votave. Megjithëse ai kishte një epërsi të qartë ndaj kundërshtarit të tij kryesor Kemal Kilicdaroglu, i cili mori 44.88%, atij i nevojitej më shumë se gjysma e votave për të fituar garën plotësisht.

Një raund i dytë do të zhvillohet më 28 maj, me Erdoganin favorit të qartë. Pak para shpalljes nga kreu i këshillit zgjedhor Ahmet Yener, rivali i presidentit u bëri thirrje mbështetësve që të mos “bien në dëshpërim” dhe të dalin dhe në raundin e dytë së bashku.

Lexo po ashtu ‘Bum votash’: Këto janë 12 provincat ku Erdogan gëzoi një rritje gjatë zgjedhjeve të fundit në Turqi

Erdogan ka qenë në pushtet në Turqi për më shumë se 20 vjet, fillimisht si kryeministër dhe më pas si president, duke i zgjeruar kompetencat e tij edhe më tej pas një grusht-shteti të dështuar në vitin 2016.

Kilicdaroglu si kandidat, opozita shihej se kishte shanset e saj më të mira deri më tani për ta hequr atë nga pushteti, për shkak të një aleance të gjerë partish.

Yener tha se të gjitha kutitë e votimit nga votimi i së dielës ishin hapur dhe pjesëmarrja në Turqi ishte 88.92%. Megjithatë, ishte e qartë se një numër votash të hedhura jashtë vendit ende nuk ishin numëruar.

Grupi ndërkombëtar i monitorimit OSBE, theksoi disa të meta në zgjedhje, duke theksuar se Erdogan dhe partitë në pushtet kishin gëzuar “një avantazh të pajustifikuar”. /Telegrafi/