Tiran apo guvernator?

Rrëfenjë turke (pjesë nga libri 101 rrëfenja turke)
Përktheu: Bajram Karabolli

Një ditë, Timurlengu ishte i mërzitur dhe, për të hequr mërzinë, thërret oborrtarët e tij që të bëjë gallatë me ta, se, kushedi, vjen në humor të mirë dhe qesh.

– Çfarë jam unë?  – pyet ai astrologun e tij. – Jam një tiran apo një guvernator?

– Ju jeni një guvernator – përgjigjet oborrtari.

Për këtë përgjigje fatziut i pritet koka, menjëherë.

Pastaj, Perandori Timurleng i drejtua një oborrtari të dytë:

– Edhe ti mendon se jam, thjesht, një guvernator?

– Jo, Perandori i madh Timurleng. Ju jeni tirani më i fuqishëm në botë!

Por, as kjo përgjigje nuk i pëlqen Timurlengut dhe urdhëron t’i presin kokën edhe këtij lumëmadhi. Më në fund, Timurlengu i drejtohet Nastradinit:

– Nastradin efendi, po ti si mendon, çfarë jam unë?

– Madhëri, ju nuk jeni as tiran dhe as guvernator – përgjigjet, shkurt, Nastradini.

– Ma shpjego!

– Nëse do të ishit tiran, nuk do të pyesnit oborrtarët e thjeshtë. Dhe, nëse do të ishit një guvernator i drejtë, nuk do t’i ndëshkonit njerëzit për të thënë të vërtetën.