Nisin hetimet për rrjedhjen e dokumenteve që duket se tregojnë ‘planet sekrete të NATO-s dhe SHBA-s’ për luftën në Ukrainë

Dokumentet sekrete që tregojnë përpjekjet e SHBA-së, Britanisë së Madhe dhe aleatëve të tjerë të NATO-s për të forcuar trupat e  Ukrainës përpara një ofensive të re kundër trupave ruse, duket se janë rrjedhur në internet, raporton Sky News, përcjell Telegrafi.

Departamenti amerikan i mbrojtjes ka nisur hetimet mbi atë se kush mund të jetë përgjegjës për rrjedhjen potencialisht të dëmshme, e cila përfshinte imazhe të dokumenteve të klasifikuara ushtarake të postuara në Twitter dhe Telegram.

Lexo po ashtu Këshilli i Mbrojtjes i Ukrainës: Maksimumi pesë persona në planet e dinë se kur do të fillojë kundërofensiva

New York Times që ishte mediumi i parë që raportoi për këtë, citoi analistë ushtarakë të thonë se dosjet duket se janë modifikuar në pjesë të caktuara, gjë që mund të tregojë një përpjekje nga Moska për të përhapur dezinformata.

Një korrespondent i Wall Street Journal vuri në dukje se kanalet e propagandës ruse duket se kishin modifikuar të paktën një nga dokumentet pasi u postuan ato origjinale.

Jaroslav Trofimov vuri në dukje se si papritmas pati një rritje të konsiderueshme të numrit të viktimave dhe humbjeve të pajisjeve ukrainase të regjistruara dhe një rënie masive në dëmtimin e betejës ruse.

Akti i vjedhjes së dokumenteve sekrete dhe i nxjerrjes së tyre, qoftë me ose pa modifikime, është një armë e vjetër e luftës informative e krijuar për të minuar një kundërshtar.

Rusia do të përfitonte që informacioni në lidhje me planet e betejës së Ukrainës dhe mbështetjen perëndimore të dalë në internet.

Dosjet e klasifikuara – ku njëra ishte e shënuar si “top sekret” dhe tjetra “sekret” – datojnë nga fundi i shkurtit dhe fillimi i marsit.

Lexo po ashtu Cila është situata në Bakhmut - qyteti 'kala' në lindje të Ukrainës

Dokumentet nuk zbulojnë data specifike apo detaje rreth ofensivës së pritshme pranverore të Ukrainës në lindje dhe jug të vendit.

Por ato ofrojnë të dhëna për llojin e formacioneve ushtarake që aleatët perëndimorë po i ndihmojnë trupat ukrainase të ndërtojnë.

New York Times tha se zyrtarët amerikanë po përpiqeshin të hiqnin dosjet nga faqet e mediave sociale.

Megjithatë, që nga mëngjesi i sotëm, versionet e dokumenteve të rrjedhura ishin ende duke u shpërndarë gjerësisht. /Telegrafi/