Ministrja e jashtme e Shqipërisë përkujton Adem Jasharin: E kujtojmë me respekt e admirimin më të thellë

Ministrja shqiptare për Evropën dhe Punët e Jashtme, Olta Xhaçka përkujtoi sot rënien heroike të Komandantit legjendar të Ushtrisë Çlirimtare të Kosovës, Adem Jashari.

Ajo theksoi se, sot kujtojmë me respekt e admirimin më të thellë këtë sakrificë sublime.

“Çerek shekulli më parë, qëndresa dhe rënia heroike e Komandantit legjendar të UÇK, Adem Jashari u kthyen në një simbol të luftës së Kosovës për liri”, u shpreh Xhaçka.

“Sot, e kujtojmë me respekt e admirimin më të thellë këtë sakrificë sublime që e ka vendosur Bacën Adem dhe familjen e tij në altarin e dëshmorëve të kombit shqiptar”, shtoi Xhaçka.

Më 5, 6 dhe 7 mars të vitit 1998, në Prekaz të Skënderajt, në Kosovë u sulmuan nga forcat serbe shtëpitë e familjes Jashari, duke lënë të vrarë mbi 50 anëtarë të kësaj familjeje.

Me aktin e rënies së komandantit legjendar Adem Jashari, familjes së tij dhe Jasharëve të tjerë, Kosova mundi frikën duke i hapur shtigjet e lirisë dhe të ardhmërisë. Dhe jo rastësisht, në Prekaz, në Lagjen e Jasharëve është ngritur monumenti më i madh i luftës për liri, për pavarësi e demokraci, që këto ditë dhe data, e pikërisht 5, 6 e 7 mars për çdo vit vëmendja e të gjithë kombit shqiptar kthehet nga Prekazi legjendar, që shekuj e vite i dha Kosovës shumë.

Historia e familjes Jashari dhe eksponentët e saj janë vendosur në Muzeun e Epopesë së Ushtrisë Çlirimtare të Kosovës. /Telegrafi/