Dita e katërt e debatit për rikonstruimin e Qeverisë, shtëpia e Taravarit edhe sot temë debati mes deputetëve

Edhe debati i sotëm në Kuvend kaloi me përplasje të ndërsjella lidhur me atë se kush e ridefinon Maqedoninë dhe kush është më shumë i përfshirë në krim dhe korrupsion. Opozita sërish me akuza se ky rikonstruktim i ngjan “Pazarit 3-shit”, ndërsa edhe kësaj here në fokus të debatit ishte shtëpia e Arben Taravarit.

“Dhe për partnerët koalicioni tanë të deritanishëm nga Aleanca. Mendova se jeni njerëz me qëndrim. Mendova se jeni të interesuar për drejtësinë në Maqedoni, mendova se jeni njerëz me dinjitet. Mua personalisht më keni zhgënjyer. Politika mund të bëjë gjithçka, por të flasësh një gjë, e pastaj ta kthesh fletën, vetëm sepse dikush dëshiron shtëpi në Taftalixhe… Mua do të më vinte turp”, deklaroi Ivanka Vasilevska nga OBRM-PDUKM.

Ndërsa Halil Snopçe nga Aleanca për Shqiptarët tha se kjo shtëpi nuk është prej tash, në atë shtëpi erdhi Mickoski për të negociuar për shumicën e re.

“E përmendni shtëpinë e doktorit Taravari. Vetëm t’ju kujtoj se në vitin 2021 në atë shtëpi z.Hristijan Mickoski e dakordonte shumicën e re bashkë me Taravarin dhe deputetët që janë ulur këtu. Në atë shtëpi, në atë shtëpi Hristijan Mickoski… ka deputetë që janë dëshmitarë dhe që janë këtu sot…”, tha Halil Snopçe nga ASH..

Kjo është dita e katërt e debatit në Kuvend për rikonstruktimin e Qeverisë, por nuk pritet të përfundojë shpejt, sepse ka edhe shumë deputetë që kërkuan fjalë për temën e shkarkimit të kuadrove të Alternativës.