Haxhiu: Unë dhe zëvendësi im Blerim Sallahu kemi dhënë deklaratë dhe dëshmi në polici pas zhdukjes së mostrave të Astrit Deharit

Ministrja e Drejtësisë, Albulena Haxhiu, i është kundërpërgjigjur akuzave të deputetit Haki Abazi për pretendimet se janë fshehur mostrat e Astrit Deharit.

Haxhiu para mediave ka thënë se bashkë me zëvendësin e tij Blerim Sallahu kanë dhënë deklaratë dhe dëshmi në polici me urdhër të prokurorisë për rastin Dehari.

Po ashtu ajo tha se janë të gatshëm të dëshmojnë sa herë që institucionet e drejtësisë i thërrasin.

“Unë dhe zëvendësi im Blerim Sallahu kemi dhënë deklaratë dhe dëshmi për institucionet e drejtësisë në Policinë e Kosovës me urdhër të prokurorisë…Informacionet të cilat i kam pasur janë në prokurori. Dhe sa herë që institucionet e drejtësisë na thërrasin ne do të jemi aty. IML sigurohet nga Policia e Kosovës. Policia e Kosovës qëndron jashtë institucionit dhe është e pamundur që të verifikojë se çka ka ndodh”, ka thënë Haxhiu, raporton Telegrafi.

Ajo tha se në Institutin e Mjekësisë Ligjore (IML), ekzistojnë kamerat, por siç tha ajo ato fshihen për një kohë shumë të shkurt.

“Sipas informacioneve që unë kam pranuar nga zyrtarët e IML, një ditë pasi ka ndodhur ky rast, kemi pyetur nëse ka kamera aty. Janë vetëm tre persona që i kanë çelësat e laboratorit. Ekzistojnë kamerat por ato fshihen për një kohë shumë të shkurt, qysh zakonshëm ndodh dhe në institucione tjera. Në krejt institucionet janë specifikat që nuk janë përgjegjësi e imja, pasi as skam bërë kontratë dhe as nuk ofrojë siguri”, ka thënë Haxhiu.

Haxhiu theksoi se ka kërkuar nga Prokuroria që t’i hetojë këto pretendime të Abazit dhe të ftohet si dëshmitar.

“Menjëherë posa kam kuptuar për një deklaratë e akuzë të tillë kam folur me prokurorinë Besim Kelmendi me deklaratat të cilat i kam marr nga mediat. Kam kërkuar që të njoftohet për këtë Prokuroria Speciale, duke marr parasysh që më këtë rast po merret Prokuroria Speciale, dhe është jashtëzakonisht e rëndësishme që dëshmitari i rastit në këtë rast, të jetë deputeti Haki Abazi. Ky rast është i ndjeshëm, ka vëmendjen e opinionit publik. Dhe secili që ka informacionin në lidhje me zhdukjen e mostrave të Astrit Deharit duhet së pari, para se të dal konferencë për media dhe të bëj akuza të tilla, të shkoj në prokurori. Shtrohet pyetja se përse nuk i ka shtruar më herët këto çështje. Nuk e di se për çka deputeti e ka fjalën, është jashtëzakonisht e rëndësishme që të bashkëpunoj me Prokurorinë Speciale…”, ka thënë ndër të tjera, ministrja Haxhiu/Telegrafi/