Këshilli i Evropës: Maqedonia e Veriut të punojë në promovimin e një shoqërie të integruar të bazuar në respektin dhe besimin ndërmjet komuniteteve

Komiteti i Ministrave të Këshillit të Evropës miratoi një rezolutë për zbatimin e Konventës Kornizë për Mbrojtjen e Pakicave Kombëtare nga Maqedonia e Veriut, e cila, ndër të tjera, kërkon promovimin e një shoqërie të integruar të bazuar në respektin dhe besimin ndërmjet komuniteteve të ndryshme, mbi të gjitha, për të shtuar përpjekjet për parandalimin e rasteve të shkeljes së të drejtave të njeriut ndaj romëve, por minoriteti bullgar në vend nuk përmendet askund, përcjell Telegrafi Maqedoni.

Në rezolutën e miratuar, Komiteti i Ministrave të Këshillit të Evropës u bën thirrje autoriteteve të RMV-së që të marrin parasysh vërejtjet dhe rekomandimet e përfshira në Mendimin e Pestë të Komitetit Këshillimor për Maqedoninë e Veriut, të miratuar më 18 maj 2022.

Në rekomandimet drejtuar autoriteteve në vend për përmirësimin e zbatimit të Konventës Kornizë, thuhet se duhet të ndërmerren hapa të mëtejshëm për promovimin e një shoqërie të integruar të bazuar në respektin dhe besimin ndërmjet komuniteteve të ndryshme.

Për të garantuar qëndrueshmërinë e Strategjisë Një Shoqëri për të Gjithë, autoritetet duhet të sigurojnë mbështetje politike të nivelit të lartë, fonde solide dhe kontakt me praktikuesit në arsim, median dhe shoqërinë civile, si dhe publikun e gjerë. Për më tepër, thuhet në të, autoriteteve u kërkohet të zbatojnë një qasje ndërkulturore ndaj arsimit duke ndarë burimet e duhura, duke vazhduar rishikimin e materialeve mësimore dhe trajnimin e mësuesve dhe personelit tjetër arsimor mbi kulturën, historinë dhe situatën aktuale të pakicave të ndryshme.

Duhet të sigurohet kontakte më të rregullta ndërmjet nxënësve të përkatësive të ndryshme etnike, duke përfshirë sigurimin e mjediseve të përziera në shkolla dhe klasa./Telegrafi/