Haxhiu: Ata që kërkojnë më shumë kompromise nga Kosova, po i hyjnë në hak asaj

Ministrja e Drejtësisë, Albulena Haxhiu, ka përkujtuar 3 dhe 4 shkurtin e vitit 2000 kur në veri të Mitrovicës shqiptarë civilë u ekzekutuan dhe shumë të tjerë u dëbuan dhunshëm nga shtëpitë e tyre.

Haxhiu ka thënë se Serbia ka shkaktuar shumë krime e dëme në Kosovë dhe se populli “ka përjetuar në lëkurën e tij këtë gjë”.

Në këtë kontekst, ajo është shprehur se ata që po i kërkojnë Kosovës të bëjë më shumë kompromise karshi Serbisë, po i hyjnë në hak asaj.

“Kur të gjithë besonin se çlirimi i Kosovës ishte kryer në qershorin e vitit 1999, në prani edhe të forcave e misionit ndërkombëtar, tetë muaj më pas, në veri të Mitrovicës popullsia shqiptare po përjetonte një tmerr tjetër”, ka shkruar ministrja në Facebook.

“Ishte kjo Nata e Tmerrit e 3 dhe 4 shkurtit të vitit 2000, ku 10 shqiptarë u ekzekutuan, 1564 familje u dëbuan nga shtëpitë e tyre dhe 11364 persona të tmerruar, dhunshëm u detyruan të largohen për të gjetur strehim për sigurinë e jetës së tyre”.

“Serbia ka shkaktuar shumë krime e dëme në Kosovë. Populli i Kosovës e ka përjetuar në lëkurën e tij këtë gjë. Ata që kërkojnë gjithnjë e më shumë kompromise ku vetëm Kosova duhet të dhënë diçka janë duke i hyrë në hak Kosovës”.

Në fund, ajo ka thënë se liria dhe shteti i Kosovës nuk janë dhuratë, ato janë arritur me gjak e sakrificë.

“Lavdi e drejtësi për martirët e natës së tmerrit të 3 dhe 4 shkurtit”, ka përfunduar Haxhiu.

Ndryshe, së fundmi janë shtuar thirrjet e bashkësisë ndërkombëtare që Kosova të formojë Asociacionin e komunave me shumicë serbe.

Por, një gjë e tillë vazhdimisht është kundërshtuar nga kryeministri Albin Kurti, i cili ka thënë se nuk mund të ketë Asociacion njëetnik pasi nuk e lejon Kushtetuta e Kosovës.

Megjithatë, i njëjti në seancën e Kuvendit të enjten, prezantoi gjashtë kushte nën të cilat u shpreh se do të pranonte formimin e Asociacionit.

Kushtet që përmendi ishin që Asociacioni të jetë në përputhje me Kushtetutën, të ndërrojë emrin, të mos jetë monoetnik, të mos ketë kompetenca ekzekutive, të drejtat e pakicave të kenë parimin e reciprocitetit, të shuhen strukturat ilegale të Serbisë, që Asociacioni të jetë pjesë e marrëveshjes finale e të zbatohet pas njohjes e që Serbia t’i tërheqë letrat dërguar shteteve mosnjohëse në BE për të kundërshtuar aplikimin e Kosovës për anëtarësim në Bashkimin Evropian. /Telegrafi/