Turqia dënon djegien e një kopje të Kuranit gjatë një proteste në Suedi, e quan “akt të ndyrë”

Turqia ka dënuar djegien e një kopje të Kuranit gjatë një proteste në Suedi, duke e përshkruar atë si një “akt të ndyrë”.

Sipas BBC, përcjell Telegrafi, vendi tha se vendimi i qeverisë suedeze për lejimin e protestës ishte “plotësisht i papranueshëm”.

Kjo vjen në kohën e rritjes së tensionit diplomatik midis dy vendeve.

Lexo po ashtu Kurani digjet pranë ambasadës turke në Stokholm, Turqia anulon vizitën e ministrit suedez të Mbrojtjes

Turqia e cila i kishte bërë thirrje Suedisë për të ndaluar protestën, më herët anuloi një vizitë të ministrit suedez të Mbrojtjes, Pal Jonson, duke thënë se udhëtimi kishte “humbur rëndësinë dhe kuptimin e tij”.

Shpresohej se udhëtimi mund të largonte kundërshtimet e Ankarasë për anëtarësimin e vendit skandinav në aleancën ushtarake të NATO-s. Turqia deri më tani ka penguar aplikimet e Suedisë dhe Finlandës në NATO.

Turqia kërkon lëshime politike, duke përfshirë dëbimin e kritikëve të presidentit të saj, Recep Tayyip Erdogan, dhe kurdëve që ajo pretendon se janë terroristë.

Turqia është tashmë një anëtare e NATO-s, që do të thotë se mund të bllokojë një vend tjetër nga anëtarësimi. Suedia dhe Finlanda aplikuan të dyja për t’u bashkuar me NATO-n pasi Rusia pushtoi Ukrainën.

Rasmus Paludan, një politikan dhe lideri i partisë politike daneze të ekstremit të djathtë Stram Kurs (Hard Line) dogji një kopje të Kuranit gjatë protestës të shtunën pasdite jashtë ambasadës turke në Stokholm. Paludan, gjithashtu ka nënshtetësi suedeze.

Një protestë e veçantë u zhvillua në qytet në mbështetje të kurdëve dhe kundër ofertës së Suedisë për t’u bashkuar me NATO-n. Një grup demonstruesish pro-turq mbajtën gjithashtu një tubim jashtë ambasadës. Të tre ngjarjet kishin leje policore. /Telegrafi/