Krasniqi: Regres e degradim në secilin sektor të vendit

Kryetari i Partisë Demokratike vendit, Memli Krasniqi sot para deputetëve të Kuvendit të Kosovës tha se në çdo sektor të vendit ka regres e degradim.

Krasniqi tha se kjo qeveri dhe kryeministri Albin Kurti nuk po kanë guxim të trajtojnë një “virus helmues për shtetin”, duke aluduar në rastin e ambasadorit Martin Berishaj.

“Ka disa muaj që kjo qeveri e kryeministri Kurti nuk kanë guxim të trajtojë një virus helmues për shtetin…U raportua në mediat sllovene për një skandal që ishte i përfshirë ambasadori Martin Berishaj…”, tha Krasniqi.

Ai tha më tej se tashmë po shihet qartë që prapa kësaj afere të ambasadorit Berishaj fshihet lidhja e thellë pushtetit me mafinë energjetike të vendeve të rajonit.

“Shkarkimi i Ambasadorit Berishaj më nuk mjafton. Duhet të bëhen hetime serioze dhe t’u jepet përgjigje pyetjeve – juridikisht, politikisht dhe moralisht. Martin Berishaj duhet të sillet para drejtësisë dhe kushdo qoftë që është në këtë piramidë” tha kreu i PDK-së.

Sipas tij, raportimet për këtë skandal kanë ardhur vetëm duke u shtuar, ndërkaq reagimi institucional në shpërputhje me seriozitetin e këtij rasti.

Ai tha se përmes heshtjes po tentohet të tejkalohet situata e krijuar pas skandalit të Martin Berishajt. “Vetëm po e konfirmojnë se edhe vet janë të përfshirë…”, tha ai, raporton Telegrafi.

Sipas kryetarit të PDK-së si mund t’ju shpjegohet qytetarëve dhe fëmijëve që duan t’i rrisin ndershëm se një ambasador tërhoqi mbi 1 milion e 500 mijë euro kesh të marra prej një kompanie serbe që tregton energji. /Telegrafi/