Ministri ukrainas i Mbrojtjes: Ukraina është bërë ‘de facto’ anëtare e NATO-s

Ukraina është bërë një anëtare de fakto e aleancës ushtarake të NATO-s, thotë ministri ukrainas i mbrojtjes, pasi vendet perëndimore – dikur të shqetësuara se ndihma ushtarake mund të shihej si një përshkallëzim nga Rusia – ndryshojnë “qasjen e tyre të të menduarit”.

Në një intervistë me BBC, Oleksi Reznikov tha se ishte i sigurt se Ukraina do të merrte armë të kërkuara prej kohësh, duke përfshirë tanke dhe aeroplanë luftarakë, pasi Ukraina dhe Rusia dukej se po përgatiteshin për ofensiva të reja në pranverë, transmeton Telegrafi.

“Ky shqetësim për nivelin e ardhshëm të përshkallëzimit, për mua, është një lloj protokolli”, tha Reznikov.

“Ukraina si vend, dhe forcat e armatosura të Ukrainës, u bënë anëtare të NATO-s, ‘de fakto’, ‘jo de jure’ [me ligj]. Sepse ne kemi armatim dhe kuptojmë se si t’i përdorim ato”.

Presidenti rus Vladimir Putin e ka cilësuar pushtimin e tij në Ukrainë si një betejë ekzistenciale kundër vendeve perëndimore që duan të dobësojnë Rusinë.

Figura ruse kanë argumentuar se po e luftojnë NATO-n në Ukrainë, pasi Perëndimi e ka furnizuar vendin me armë në atë që ata e shohin si një luftë agresioni.

Ukraina, për vite me radhë, ka kërkuar të bashkohet me NATO-n, diçka që presidenti Putin e ka përshkruar si një kërcënim sigurie për Rusinë.

Presidenti ukrainas Volodymyr Zelensky ka bërë thirrje për pranim të shpejtë, por mbetet e paqartë nëse anëtarësimi i plotë është diçka që anëtarët e aleancës do ta konsiderojnë seriozisht edhe pas përfundimit të luftës, pavarësisht premtimeve për mbështetje.

Megjithatë, Reznikov mohoi që komentet e tij do të shiheshin si të diskutueshme, jo vetëm nga Rusia, por ndoshta edhe nga vetë NATO, pasi aleanca e udhëhequr nga SHBA-ja, edhe pse mbështet Ukrainën, ka ndërmarrë hapa që të mos shihet si palë në konfliktin.

“Pse [do të ishte] e diskutueshme? Është e vërtetë. Është një fakt”, tha Reznikov. “Jam i sigurt se në të ardhmen e afërt do të bëhemi anëtarë të NATO-s, de jure”. /Telegrafi/